უმცირესობის წევრი ნუგზარ წიკლაური „ნაციონალური მოძრაობის“ გუშინდელ ყრილობას „ფეისბუქზე“ ეხმაურება.

წიკლაური ყრილობას მასშტაბურს უწოდებს და ამბობს, რომ პარტიის რიგებს 20 ათასი ახალი წევრი შეემატა.

უმცირესობის წევრი მხარდაჭერას უცხადებს თავდაცვის ყოფილ მინისტრს ბაჩო ახალაიას და ყოფილს პრემიერს ვანო მერაბიშვილს.

„ერთიანი ნაციონალური მოძრაობის დღევანდელმა მასშტაბურმა შეკრებამ საბოლოოდ დაუსვა წერტილი ბიძინა ივანიშვილის დეკლარირებულ ოცნებას, რომ გაეჩუმებინა და გაენადგურებინა ქართული პატრიოტული ძალა, რომელსაც ოლიგარქი სამართლიანად მიიჩნევს მისი რენეგატული ხელისუფლებისთვის უმთავრეს საფრთხედ. ეს არსებითი წარმატებაა. ამასთან, ყველას უნდა გვესმოდეს, რომ ბრძოლა გრძელდება და საბოლოო, დიდი გამარჯვების მოსაპოვებლად მრავალი სირთულის გადალახვა მოგვიწევს ერთად.

დღესდღეობით ჩვენი რიგები ძლიერდება, პარტიაში 20000 ახალი წევრი გვყავს, ადამიანებს რწმენა უმტკიცდებათ... ერთობით და ერთგულებით გავიმარჯვებთ. ყველა მხარდამჭერს ვუხდი დიდ მადლობას. საგანგებოდ კი მათ, ვინც დღეს უსამართლოდ არის დატყვევებული.

მათი ბრძოლა და თავდადება ჩვენი საერთო ბრძოლის განუყრელი ნაწილია. განსაკუთრებული სალამი ჩემს ძვირფას მეგობრებს - ბაჩოს და ვანოს. ცუდი დღეები უკან დარჩება და მას გამარჯვების სიხარული შეცვლის. მაგრად იყავით, ძალა ერთობაშია!“, - წერს წიკლაური.