გოკა გაბაშვილი - პარლამენტში დიპლომის ასლი მიტანილი მაქვს

პოლიტიკა - 19:38, 08 May, 2014

1638

უმცირესობის წევრი გოკა გაბაშვილი “IDFI“-ის მიერ გუშინ გამოქვეყნებულ ინფორმაციას ეხმაურება, სადაც ნათქვამია, რომ პარლამენტში მისი დიპლომის ასლი არ მოიპოვება. გაბაშვილი „ნიუპოსტთან“ საუბრისას აღნიშნულ ინფორმაციას უარყოფს და ამბობს, რომ მას პარლამენტში დიპლომის ასლი მიტანილი აქვს.
„მე მიტანილი მაქვს პარლამენტში დიპლომის ასლი, მათ გადასცეს თუ არა შესაბამის სამსახურს, ეს უკვე მათი საქმეა“, - განაცხადა „ნიუპოსტთან“ საუბრისას გოკა გაბაშვილმა.
ინფორმაციის თავისუფლების განვითარების ინსტიტუტმა (IDFI) საქართველოს პარლამენტის აპარატს მიმართა და პარლამენტის წევრთა უმაღლესი განათლების დამადასტურებელი დოკუმენტაციის ასლების მიღება ითხოვა.
პარლამენტის აპარატმა ინსტიტუტის მოთხოვნა დააკმაყოფილა, თუმცა მოწოდებულ მასალებში 5 დეპუტატის უმაღლესი განათლების დამადასტურებელი დოკუმენტაციის ასლები არ მოიპოვებოდა.
გიორგი გაბაშვილი, ლევან ქარდავა , გიორგი ქავთარაძე, რევაზ შავლოხაშვილი და ნუგზარ წიკლაური საქართველოს პარლამენტის ოფიციალური ვებ-გვერდის მონაცემებით ფლობენ შემდეგ სპეციალობებს:
- გიორგი გაბაშვილი – გერმანული ენა-ლიტერატურა,
- ლევან ქარდავა – სამართალმცოდნეობა,
- გიორგი ქავთარაძე – დრამის რეჟისორი,
- რევაზ შავლოხაშვილი – თვითმფრინავთმშენებლობა,
- ნუგზარ წიკლაური - ქართული ენა და ლიტერატურა.