შერიგებისა და სამოქალაქო თანასწორობის საკითხებში სახელმწიფო მინისტრმა პაატა ზაქარეიშვილმა საოკუპაციო ხაზის გასწვრივ გახშირებული გატაცებების ფაქტების კომენტირებისას განაცხადა, რომ ასოცირების ხელშეკრულების ხელმოწერის კონტექსტში გარკვეული დაძაბულობა გამორიცხული არ არის:

"გატაცებებთან დაკავშირებით მუშაობს შს სამინისტრო და როგორც წესი, საკმაოდ ეფექტურად, ვინაიდან გატაცებულთა გათავისუფლება საკმაოდ სწრაფად ხდება. არის ხოლმე, როდესაც შაბათ-კვირა ემთხვევა და საოკუპაციო ტერიტორიაზე ე.წ. სასამართლო არ მუშაობს, ამიტომ ელოდებიან ე.წ. სასამართლოს შეკრებას, რომ მოხდეს დაკავებულთა უკანონო გასამართლება და შემდეგ ხდება მათი გათავისუფლება.

ასოცირების ხელშეკრულების ხელმოწერის კონტექსტში გამორიცხული არ არის გარკვეული დაძაბულობა. მთავრობა თავს იკავებს და სწორად ვიქცევით, მაგრამ ყველას იგივეს ვერ მოვთხოვთ. მოქალაქეებს მოვუწოდებთ მეტი სიფრთხილისკენ, რათა საფუძველი არ მივცეთ მოწინააღმდეგე მხარეს, რომ გამოიყენოს ეს პოლიტიკური მიზნებისთვის", - განაცხადა ზაქარეიშვილმა.