თეა წულუკიანი: "ჩვენ მიღწეულით არ ვკმაყოფილდებით"

პოლიტიკა - 17:00, 08 May, 2014

1785

დუბლინში ღია მმართველობის პარტნიორობის ევროპის რეგიონული შეხვედრა გაიხსნა, რომელშიც ევროპის რეგიონის წევრი ქვეყნების სამთავრობო, სამოქალაქო საზოგადოებისა და ბიზნესსექტორის წარმომადგენლები მონაწილეობენ. საქართველოს დელეგაციას იუსტიციის მინისტრი თეა წულუკიანი ხელმძღვანელობს.
იუსტიციის მინისტრი გახსნით პლენარულ სხდომაზე ძირითად მომხსენებლად წარდგა და საქართველოს ხელისუფლების მიერ ღიაობის, ანგარიშვალდებულებისა და გამჭვირვალობის უზრუნველყოფის მიზნით გატარებული რეფორმების შესახებ ისაუბრა.
თეა წულუკიანის განცხადებით, ღია მმართველობის პარტნიორობის ევროპის რეგიონულ სამიტზე განსაკუთრებით საინტერესო აღმოჩნდა საქართველოს მიღწევები.
„ღია მმართველობის ფარგლებში საქართველოს ძალიან ბევრი ისეთი რეფორმა აქვს გატარებული, რომლებიც მისაბაძი და სამაგალითოა ტრადიციული ევროპული ქვეყნებისთვისაც კი. თუმცა, ჩვენ მიღწეულით არ ვკმაყოფილდებით და საქართველო აგრძელებს ინოვაციური პროექტების განხორციელებას, რაც მთავრობის მეტ გამჭვირვალობასა და ანგარიშვალდებულებას უზრუნველყოფს“, − განაცხადა თეა წულუკიანმა.
მინისტრმა საერთაშორისო კონფერენციის მონაწილეებს ინფორმაცია მიაწოდა სამოქალაქო და ფართო საზოგადოებასთან კონსულტაციების, რეფორმების პროცესში მათი აქტიური ჩართულობის შესახებ, გააცნო მათ ელექტრონული მმართველობის წარმატებულ ინიციატივები და სამომავლო გეგმები. საქართველოს იუსტიციის მინისტრი გახსნით პლენარულ სხდომაზე საერთაშორისო საზოგადოების წინაშე ირლანდიის სახელმწიფო ხარჯებისა და რეფორმების მინისტრთან ერთად წარდგა.
ღია მმართველობის პარტნიორობის ევროპის რეგიონული შეხვედრა 9 მაისს შემაჯამებელი სხდომით დაიხურება.