ირაკლი ღარიბაშვილი ბათუმის პორტში აშშ-ის სამხედრო გემის შემოსვლას მიესალმება

პოლიტიკა - 14:56, 08 May, 2014

1744

საქართველოს პრემიერ-მინისტრი ირაკლი ღარიბაშვილი ბათუმის პორტში აშშ-ის სამხედრო გემის „ტეილორის" შემოსვლას მიესალმება.
როგორც პრემიერმა დღევანდელ სხდომაზე განაცხადა, დღეს საქართველოში აშშ-ის მე-6 ფლოტის სამხედრო გემი „ტეილორი" შემოვიდა, რომლის პერსონალი საქართველოს სანაპირო დაცვას გამოცდილებას გაუზიარებს.
„ეს არ არის პირველი შემთხვევა, როდესაც ბათუმის პორტში მსგავსი ტიპის გემი შემოდის. ეს მნიშვნელოვანია ჩვენი სანაპირო დაცვის თანამშრომლებისთვის და რაც მთავარია, კიდევ ერთხელ ხაზს უსვამს საქართველოსა და აშშ-ს შორის მეგობრულ ურთიერთობას", - აღნიშნა ღარიბაშვილმა.
პრემიერ-მინისტრმა სინანული გამოთქვა, რომ ბათუმში დაგეგმილ ღონისძიებებზე დასწრებას მთავრობის სხდომისა და ჯანდაცვის პროგრამის შედეგების პრეზენტაციის გამო ვერ ახერხებს. ირაკლი ღარიბაშვილის განმარტებით, ღონისძიებებს ბათუმში ვიცე-პრემიერი გიორგი კვირიკაშვილი, შინაგან საქმეთა მინისტრი ალექსანდრე ჭიკაიძე და პარლამენტის წევრები დაესწრებიან.

ბათუმის ნავსადგურში ამერიკის სამხედრო-საზღვაო ძალების კუთვნილი ხომალდი „ტეილორი“ დღეს შემოვიდა. ხომალდი სამ დღეს დარჩება.

„ტეილორი“ შეერთებული შტატების სამხედრო საზღვაო ძალებისთვის აგებული რიგით მე-40 ფრეგატია. იგი 35 წლისაა. მისი ეკიპაჟი 200 სამხედრო მოსამსახურისგან შედგება. ხომალდი გამანადგურებელია და შეუძლია როგორც წყალქვეშა გემების განადგურება, ასევე საჰაერო კონტროლი.