NDI-ის კვლევის შედეგების თანახმად, ხელისუფლების წარმომადგენელთა მოწონების რეიტინგი დაეცა. მოწონების რეიტინგის მიხედვით პირველ ადგილზეა თავდაცვის მინისტრი ირაკლი ალასანია - 67%-იანი რეიტინგით, ნოემბრის კვლევაში მისი მოწონების რეიტინგი 72% იყო.

ალასანიას ირაკლი ღარიბაშვილი მოსდევს, რომელიც გამოკითხულთა 64%-ს მოსწონს. NDI-ის წინა კვლევაში ღარიბაშვილის ეს მაჩვენებელი 71%-ს შეადგენდა.

სხვა პოლიტიკური თანამდებობის მქონე პირთა მიმართებაში სარეიტინგო მონაცემები ასე გამოიყურება: პარლამენტის თავმჯდომარის დავით უსუფაშვილის მოწონების რეიტინგი ახლა 61%-ია, ნოემბრის კვლევაში იყო – 65%; კახა კალაძის მოწონების რეიტინგია – 51%, ნოემბერში - 60%; ბიძინა ივანიშვილი ახლა გამოკითხულთა მხოლოდ 51%-ს მოსწონს, მისი მოწონების მაჩვენებელი ნოემბრის კვლებაში 74% იყო.

პრეზიდენტ მარგველაშვილის რეიტინგი 46%-მდე შემცირდა. ნოემბრის კვლევაში მარგველაშვილი გამოკითხულთა 72%-ს მოსწონდა.

ასევე, კვლევის თანახმად, საპარლამენტო უმრავლესობის წევრების მოწონების მაჩვენებელი შემცირებულია.

რაც შეეხება ოპოზიციის წარმომადგენელთა მოწონების მაჩვენებელს, მათი რეიტინგი ახალი კვლევის მიხედვით გაიზარდა.

"ერთიანი ნაციონალური მოძრაობის" ერთ-ერთი ლიდერი დავით ბაქრაძე რესპონდენტთა 51%-ს მოსწონს, მოსწონდა გამოკითხულთა – 48%-ს; შალვა ნათელაშვილი მოსწონდა 34%-ს და ახალი კვლევის მიხედვით კი გამოკითხულთა 44%-ს მოსწონს. 21%-დან 25%-მდეა გაზრდილი ჯონდი ბათაღურიას მოწონების რეიტინგი.

NDI-ს კვლევის საველე სამუშაოები 26 მარტიდან 18 აპრილის პერიოდში ჩატარდა და მის ფარგლებში 3 942 ადამიანი გამოიკითხა.