საქართველოს და გაერთიანებულ სამეფოს შორის ყოველწლიური ორმხრივი დიალოგი განახლდება

პოლიტიკა - 10:52, 08 May, 2014

1230

საქართველოს საგარეო საქმეთა მინისტრი დიდი ბრიტანეთისა და ჩრდილოეთ ირლანდიის გაერთიანებული სამეფოს საგარეო და თანამეგობრობის საქმეთა სახელმწიფო მდივანს, უილიამ ჰეიგს შეხვდა, რომელიც საქართველოში ოფიციალური ვიზიტით იმყოფება.
მაია ფანჯიკიძემ და უილიამ ჰეიგმა შეხვედრის დროს განიხილეს ორმხრივი და მრავალმხრივი თანამშრომლობის ფართო სპექტრი.
ყურადღება გაამახვილეს თავდაცვის, ეკონომიკის, ვაჭრობის, განათლების და სხვა სფეროებში ურთიერთობების შემდგომ გაღრმავებაზე.
მხარეებმა ხაზი გაუსვეს საქართველოსა და ევროკავშირს შორის ასოცირების შესახებ შეთანხმების ხელმოწერის და მისი შემდგომი, ეფექტიანი იმპლემენტაციის მნიშვნელობას, ასევე საქართველოსთვის უვიზო რეჟიმის დაჩქარებული ტემპით შემოღების შესაძლებლობას.
გამოითქვა რწმენა, რომ გაერთიანებული სამეფოს მხარდაჭერით საქართველო შეძლებს კონკრეტული შედეგების მიღწევას ევროპასთან შემდგომი დაახლოების პროცესში. უილიამ ჰეიგმა პოზიტიურად შეაფასა საქართველოს მთავრობის მიერ ევროკავშირთან ურთიერთობების გაღრმავების მიზნით გატარებული რეფორმების კურსი. საქართველოს ნატოში ინტეგრაციასთან მიმართებით მაია ფანჯიკიძემ და უილიამ ჰეიგმა გამოთქვეს იმედი, რომ საქართველოს მიერ მიღწეული პროგრესი ჩრდილოატლანტიკურ ალიანსთან დაახლოების პროცესში სათანადოდ შეფასდება მიმდინარე წელს, ნატოს უელსის სამიტზე. საქართველოს საგარეო საქმეთა მინისტრმა აღნიშნა, რომ საქართველოს ევროატლანტიკური ინტეგრაციის კონტექსტში განსაკუთრებული მნიშვნელობა ენიჭება დიდი ბრიტანეთის, როგორც მომავალი სამიტის მასპინძელი ქვეყნის, მხარდაჭერას.
სახელმწიფო მდივანმა ხაზგასმით აღნიშნა საქართველოს წვლილი ევროატლანტიკური უსაფრთხოების უზრუნველყოფის საქმეში. ამ კონტექსტში მან მადლობა გადაუხადა საქართველოს მნიშვნელოვანი კონტრიბუციისთვის ISAF-ის ფარგლებში და აგრეთვე ჩვენი ქვეყნის მზაობისათვის, მონაწილეობა მიიღოს სხვა მისიებში მსოფლიოში მშვიდობის უზრუნველყოფის ხელშეწყობის მიზნით.
განსაკუთრებული ყურადღება დაეთმო საქართველოში უსაფრთხოებისა და სტაბილურობის თვალსაზრისით შექმნილ ვითარებას, კერძოდ, საოკუპაციო ხაზის გასწვრივ რუსეთის მუდმივ პროვოკაციებს, რაც მოიცავს მშვიდობიანი მოქალაქეების გატაცებას, მავთულხლართების გავლებას, საჰაერო სივრცის დარღვევას და ა.შ. ამ კონტექსტში მაია ფანჯიკიძემ კიდევ ერთხელ გამოხატა საქართველოს მადლიერება ბრიტანელი დამკვირვებლების მონაწილეობისთვის ევროკავშირის სადამკვირვებლო მისიაში.
მაია ფანჯიკიძემ და უილიამ ჰეიგმა გამოხატეს უკიდურესი შეშფოთება უკრაინის კრიზისთან დაკავშირებით. მხარეები მიიჩნევენ, რომ პრობლემა აუცილებელია მოგვარდეს მშვიდობიანი გზით, უკრაინის დამოუკიდებლობის, სუვერენიტეტისა და ტერიტორიული მთლიანობის გათვალისწინებით და საერთაშორისო თანამეგობრობის აქტიური მხარდაჭერით, რათა უკრაინას მიეცეს შესაძლებლობა, გახდეს ერთიანი ევროპული ოჯახის სრულფასოვანი წევრი.
შეხვედრაზე გადაწყვიტეს განახლდეს საქართველოს და გაერთიანებულ სამეფოს შორის ყოველწლიური ორმხრივი დიალოგი, რომლის ფარგლებშიც მხარეები განიხილავენ ორ ქვეყანას შორის სხვადასხვა სფეროში არსებული თანამშრომლობის და მისი გაღრმავების საკითხებს.