საქართველოს თავდაცვის მინისტრის თქმით, რუსეთის მხრიდან საბრძოლო მოქმედებების განახლების საფრთხე მცირეა, თუმცა „მთავრობა ყველა სცენარისთვის მზად არის“.

ამის შესახებ ირაკლი ალასანიამ ტელეკომპანია "მაესტროს" ეთერში რუსეთის ქმედებებზე საუბრისას განაცხადა.

მისივე განმარტებით, პრემიერისგან და მთავრობისგან სამხედრო დიპლომატიური ნაბიჯები იდგმება, რათა ქვეყანა ასეთ განსაცდელში აღარ ჩარადეს.

"ჩვენ ორმხრივ ფორმატებში, ჩვენს სტრატეგიულ პარტნიორებთან ვფიქრობთ და ვავითარებთ ჩვენს თავდაცვით შესაძლებლობებს. რაც შეეხება პირდაპირ საფრთხეს, კონკრეტულად, საბრძოლო მოქმედებების განახლების საფრთხეს, მე ვარ იმ აზრზე, რომ ამის შესაძლებლობა ამ ეტაპზე არის ძალიან მცირე. პირველი იმიტომ, რომ რუსეთი იმ პრობლემებშია ჩართული, რაც უკრაინასთან აქვს და ის ავანტურა, რაც წამოიწყო, უკვე ძალიან ძვირად უჯდება. რაც შეეხება ჩვენთან ურთიერთობებს, მე აბსოლუტურად ვიზიარებ იმ პოლიტიკას, რომელიც აქვს საქართველოს მთავრობას, რომ არ მივცეთ არანაირი მიზეზი იმისა, რომ რუსეთმა რაიმე ფორმით, პოლიტიკური თუ სხვა ფორმით განახორციელოს საქართველოზე თავდასხმა, მაგრამ ამასთან ერთად ჩვენ ვემზადებით ყველა სცენარისთვის", - აღნიშნა ირაკლი ალასანიამ.