ლექსო თამაზაშვილი - კანონით პარლამენტის წევრს არ მოეთხოვება უმაღლესი განათლება

პოლიტიკა - 10:05, 08 May, 2014

3008

საპარლამენტო უმრავლესობის წევრი ალექსანდრე თამაზაშვილი მის განათლებასთან დაკავშირებით განმარტებებს აკეთებს.
აღნიშნულ საკითხს თამაზაშვილი განცხადებით გამოეხმაურა.

"მოგესალმებით ყველას, ჩემი ცხოვრებიდან გამომდინარე დასამალი და მისაჩქმალი არასოდეს არ მქონია. მინდა დავაკმაყოფილო საზოგადოების გარკვეული ნაწილის ცნობისმოყვარეობა და იმ დიდი ინტერესიდან გამომდინარე, რომელიც გამოიწვია ჩემს ხანგრძლივ სტუდენტობასთან დაკავშირებით გავრცელებულმა ინფორმაციამ და (არა)კეთილმოსურნეთათვის განვმარტავ: 2007 წელს მუშაობა დავიწყე სატრანსპორტო კომპანიაში, იურისტის თანაშემწედ (შემდგომში იურისტად 2008-2012 წლებში) იმ პეროდისთვის ვირიცხებოდი დამამთავრებელ სემეტრში , შესაბამისად ვეღარ მოვახერხე სწავლის და სამსახურის შეთავსება რის გამოც სტუდენტის სტატუსი შემიჩერდა. 2014 წელს გავიარე რეგისტრაცია დამამთავრებელ სემეტრის სტუდენტად. შეგახსენებთ რომ კანონით პარლამენტის წევრს არ მოეთხოვება უმაღლესი განათლება და შესაბამისად ზედმეტად მიმაჩნია, მსგავსი თემებით სპეკულირება... დაინტერესებულ პირებისთვის ასევე მინდა განვასაჯაროვო, რომ: 2008 წელს გავიარე FIATA-ს კურსები (ფიატა ეს არის საერთაშორისო გადამზიდავთა ასოციაცია, რომელიც 1926 წელს დაარსდა ავსტრიაში და მასში 40,000-ზე მეტი გადამზიდავია გაერთიანებული მსოფლიოს გარშემო) და სურვილის შემთხვევაში წარმოგიდგენთ შესაბამის დამადასტურებელ დიპლომს", - აცხადებს ალექსანდრე თამაზაშვილი.

გუშინ გამოქვეყნებული ინფორმაციის თანახმად, რომელიც IDFI-მ საქართველოს პარლამენტის აპარატზე დაყრდნობით გამოაქვეყნა, "ქართული ოცნების" პარტიული სიით არჩეული დეპუტატი ალექსანდრე თამაზაშვილი 2002 წელს ჩაირიცხა თბილისის სახელმწიფო უნივერსიტეტში და ამჟამად რეგისტრირებულია როგორც 2013-2014 სასწავლო წლის დამამთავრებელი სემესტრის სტუდენტი.