რიჩარდ ნორლანდმა ეკლესიის გუმბათის ჩამონგრევის დროს დაშავებულები მოინახულა

პოლიტიკა - 20:20, 07 May, 2014

1647

ამერიკის შეერთებული შტატების ელჩმა საქართველოში რიჩარდ ნორლანდმა ბათუმის რეფერალურ საავადმყოფოში ახალსოფელში მშენებარე ეკლესიის გუმბათის ჩამონგრევის დროს დაშავებულები მოინახულა.
ელჩმა შემთხვევის შედეგად ორი ადამიანის გარდაცვალების გამო მწუხარება გამოთქვა.
მისივე თქმით, როგორც კი გაიგო ტრაგედიის შესახებ, მაშინვე გადაწყვიტა დაშავებულების მონახულება და დახმარების შეთავაზება.
ელჩის თქმით, ხვალ ამერიკის საზღვაო ძალების ხომალდი შემოდის ბათუმში და თუ საჭირო იქნება, ხომალდის ექიმები დაეხმარებოდნენ, თუმცა როგორც რიჩარდ ნორლანდმა განმარტა, ადგილობრივი ხელისუფლება სათანადოდ ზრუნავს დაშავებულებზე.
"მინდა გამოვხატო ჩემი მწუხარება იმ ორი ადამიანის გარდაცვალების გამო, რომლებიც ეკლესიის მშენებლობის დროს დაიღუპნენ. მე და ჩემი მეუღლე ვიმყოფებით ბათუმში, ხვალ ვმასპინძლობთ ბათუმში ამერიკის საზღვაო ძალების გემს, მაგრამ როგორც კი გავიგეთ ამ ტრაგედიის შესახებ, გადავწყვიტეთ მოვსულიყავით საავადმყოფოში და შეგვეთავაზებინა რაიმე ფორმის დახმარება, თუ იქნებოდა ამის საჭიროება, ვინაიდან გემს ეყოლება ექიმები. თუმცა ჩანს, რომ ადგილობრივი ხელისუფლება შესაბამისად, კარგად უმკლავდება ვითარებას, სათანადო ზრუნვა აღმოეჩინა დაზიანებულ ადამიანებს, რომლებიც საავადმყოფოში მოვიდნენ. შეგვიძლია მორალური მხარდაჭერა გამოვთქვათ და კიდევ ერთხელ მივუსამძიმროთ დაღუპულთა ოჯახებს", - აღნიშნა ნორლანდმა.