ლევან ბეჟაშვილი ,,რუსთავი2"- ის საქმეზე საპარლამენტო კომისიის შექმნას ითხოვს

პოლიტიკა - 15:54, 07 May, 2014

1729

პარტია „ერთიანი ნაციონალური მოძრაობა“ „რუსთავი 2“–ის ჟურნალისტებისადმი მიყურადების საქმის შესასწავლად საპარლამენტო კომისიის შექმნას მოითხოვს.

საპარლამენტო უმცირესობის წევრ ლევან ბეჟაშვილის განცხადებით, შინაგან საქმეთა სამინისტრო "გაორმაგებული და გაათმაგებული ძალისხმევით აგრძელებს" მოსმენების მავნე პრაქტიკას.

„რუსთავი 2“–ის მოსმენა ცალსახად უკანონო ფაქტია, გარდა ამისა, ეს შეიძლება ჟურნალისტურ საქმიანობაში ხელის შეშლისა და ზემოქმედების ფაქტადაც ჩაითვალოს. ვფიქრობ, რომ ეს რიგითი თანამდებობის პირების გადაწყვეტილება არ იქნებოდა. არსებობს ეჭვი, რომ სხვა ტელევიზიებშიც და პარლამენტშიც იყოს სათვალთვალო ფარული კამერები, რაზეც ბომბის შესახებ ერთი წლის წინანდელი მასობრივი ზარები მეტყველებს. ეს იმაზე მიუთითებს, რომ ყველაფერი კარგად ორგანიზებული იყო. უმრავლესობა ამ უკანონო ფაქტის „გაპრავების“ ნაცვლად, დაინტერესებული უნდა იყოს ობიქეტური გამოძიებით. ჩვენ მათ ვთავაზობთ შეიქმნას საპარლამენტო საგამოძიებო კომისია, იმიტომ რომ არსებულ პროკურატურას და შინაგან საქმეთა სამინისტროს არა აქვს საზოგადოების ნდობა გამოძიების ობიექტურად ჩატარებასთან დაკავშირებით“, - განაცხადა ლევან ბეჟაშვილმა.