ნიკა გვარამია - არასერიოზულ კომენტარებში ბატონი ღარიბაშვილი შემჩნეულია

პოლიტიკა - 21:35, 06 May, 2014

2222

ტელეკომპანია "რუსთავი 2"-ის გენერალური დირექტორი ნიკა გვარამია პრემიერის მიერ "რუსთავი 2"-თან დაკავშირებულ კომენტარს "უკიდურესად არასერიოზულს" უწოდებს.

როგორც გვარამიამ "პალიტრა ტვ"-ს გადაცემა "რეზიუმეში" სატელეფონო ჩართვისას განაცხადა, პრემიერის კომენტარიდან შინაარსი ვერ გამოიტანა.

"მე საერთოდ შინაარსი ვერ გამოვიტანე, გარდა იმისა, რომ ეს არის უკიდურესად ზერელე და არასერიოზული კომენტარი, რაშიც კრიტიკულ მომენტებში შემჩნეულია ბატონი ღარიბაშვილი. მან უკვე რამდენჯერმე გააკეთა ასეთი ტიპის კომენტარი, სხვა საკითხებს ვგულისხმობ და არა "რუსთვი 2"-ს. მაგრამ ჩვენთან მიმართებითაც, როდესაც ქვეყანაში არის პრაქტიკულად ერთ-ერთი ყველაზე უფრო მსხვილი მედიასკანდალი ხელისუფლების მონაწილეობით, ასეთი ტიპის კომენტარი, თუნდაც სულ რომ დარწმუნებული იყო, რომ მართლა არაფერ შუაშია ხელისუფლება, ჩემი აზრით არის ღრმად არასერიოზული. რაც მთავარია, ამ კომენტარს რაციონალური შინაარსი საერთოდ არ აქვს", - აღნიშნა ნიკა გვარამიამ.

პრემიერ-მინისტრი ირაკლი ღარიბაშვილი „რუსთავი 2“-ში მოსასმენი მოწყობილობების აღმოჩენის ფაქტს ცოტა ხნის წინ გამოეხმაურა.

ღარიბაშვილი ინტერესდება, ვინ აღმოაჩინა ეს მოსასმენი მოწყონილობები.

“თქვენ გჯერათ ამის? ვინ აღმოაჩინა? “რუსთავი 2” აქტიურობს, ახალი იდეების და იმპროვიზაციის უნარი გაქვთ. ინიციატივებს იჩენთ. აქაც არის მემგონი ფარული კამერები”, - განუცხადა პრემიერმა “რუსთავი 2”-ის ჟურნალისტს.