ვახტანგ ხმალაძე - შესაძლოა გვარამიასა და შუბლაძის მიყურადებაზე სასამართლო განჩინება არსებობდეს

პოლიტიკა - 16:45, 06 May, 2014

1959

საპარლამენტო უმრავლესობის წარმომადგენლი ვახტან ხმალაძე ტელეკომპანია „რუსთავი 2“-ში მოსასმენი მოწყობილობების აღმოჩენის ფაქტს ეხმაურება.

მისი თქმით, "რუსთავი2"-ის ხელმძღვანელობის დღევანდელ განცხადებასთან დაკავშირებით აუცილებლად უნდა აღიძრას სისხლის სამართლის საქმე და დაიწყოს გამოძიება.

"გამოძიებამ უნდა გამოავლინოს, მართლა იყო თუ არა ფარული მოსმენა. მაგალითად, მე შემიძლია რაღაც აპარატურით ვინმესთან საკუთარი ურთიერთობის ამსახველი სურათი ან ვიდეო გადავიღო, შემდეგ მოვიწვიო პრესკონფერენცია, წარმოვადგინო ვიდეო და ვთქვა, რომ "აი, ნახეთ, ფარულ მიყურადებას ახორციელებენ". ასეთი რამ თეორიულად გამორიცხული არ არის. გამოძიებამ უნდა გაარკვოს, იყო თუ არა ფარული მიყურადება. თუ ფარული მიყურადება არ იყო და ეს არის ცილისწამება და საზოგადოების შეცდომაში შეყვანა, მაშინ პროცესი ამ მიმართულებით უნდა გაგრძელდეს. თუ აღმოჩნდა, რომ ფარული მიყურადება იყო, ამის შემდეგ უნდა გაირკვეს, ეს მიყურადება იყო კანონიერი თუ უკანონო. უნდა ინახოს, ხომ არ არსებობს სასამართლო განჩინება, რომლითაც გაიცა ნებართვა ნიკა გვარამიას და ნინო შუბლაძის მიყურადების თაობაზე. თუ ასეთი ნებართვა არსებობდა, მაშინ მიყურადება ყოფილა კანონიერი, თუ ასეთი ნებართვა არ არსებობდა, მაშინ მიყურადება ყოფილა უკანონო, ხოლო თუ უკანონოა, გამოძიება უნდა გაგრძელდეს იმ მიმართულებით, თუ ვინ განახორციელა უკანონო მიყურადება, უნდა გამოვლინდეს შესაბამისი პირი და დაისაჯოს კანონის შესაბამისად", - განაცხადა ხმალაძემ.