სახალხო დამცველი უჩა ნანუაშვილი ტელეკომპანია „რუსთავი 2“-თან დაკავშირებული მოვლენების შესახებ კომენტარს აკეთებს. დღეს გამართულ ბრიფინგზე ომბუდსმენმა განაცხადა, რომ როცა საქმე მედიასაშუალებას ეხება გამოძიება მაქსიმალურად ეფექტურად უნდა განხორციელდეს.

"ჩვენ დავინტერესდებით ამ საკითხით, რომ გვქონდეს დეტალური ინფორმაცია ამ საკითხის გამოძიებასთან დაკავშირებით. რა თქმა უნდა, ნებისმიერი უკანონო მიყურადება არის უკანონო, მაგრამ როცა საუბარია მედიასაშუალების საქმიანობაზე, ეს განსაკუთრებით სენსიტიურია და ამ მხრივ აუცილებელია დაუყოვნებლივ ეფექტური გამოძიების დაწყება, ყველა იმ კითხვაზე პასუხის გაცემა, რაც შესაძლოა წარმოიშვას ამ საკითხთან დაკავშირებით", - აღნიშნა უჩა ნანუაშვილმა.

შეგახსენებთ, რომ ტელეკომპანია „რუსთავი 2“-ის გენერალურმა დირექტორმა და ჟურნალისტებმა საგანგებო ბრიფინგი გამართეს, სადაც განაცხადეს, რომ ტელეკომპანიაში ფარული თვალთვალი და მოსმენები ხორციელდებოდა.