ავსტრიის რესპუბლიკაში ვიზიტით მყოფი საქართველოს საგარეო საქმეთა მინისტრი, მაია ფანჯიკიძე ევროსაბჭოს მინისტრთა კომიტეტის 124-ე სხდომაში მონაწილეობს.

მინისტერიალის დღის წესრიგში საქართველოს თემა მოქცეულია ზოგადი თემის ქვეშ: The current crisis in Europe, რაც გულისხმობს იმას, რომ მინისტერიალის დროს საქართველოზე დებატები უკრაინისა და გენერალური მდივნის ყოველწლიური ანგარიშის თემებთან ერთად გაიმართება.

დღის წესრიგში კონფლიქტი საქართველოში მოხსენიებულია, როგორც ევროპის საბჭოს ერთ-ერთი უმნიშვნელოვანესი გამოწვევა.

მინისტერიალი ასევე მიიღებს გადაწყვეტილებას, რომლის თანახმად საქართველოზე გენერალური მდივნის მე-9 კონსოლიდირებული ანგარიში იქნება ცნობად მიღებული.

დეტალურ დღის წესრიგში მოხსენიებული იქნება მინისტრთა მოადგილეების კომიტეტის მიერ 2014 წლის 29 აპრილს მიღებული გადაწყვეტილება საქართველოზე და ეს გადაწყვეტილება გავრცელდება ვენის მინისტერიალზე (ჩაიდება მინისტერიალის საქაღალდეში).

შეხვედრაზე დაგეგმილია საგარეო საქმეთა მინისტრის სიტყვით გამოსვლა, რომლის დროსაც ის შეეხება საქართველოს ოკუპირებულ ტერიტორიებზე ადამიანის უფლებების დარღვევის ფაქტებს და სხდომის მონაწილეებს მიაწვდის ინფორმაციას საოკუპაციო ხაზის გასწვრივ მავთულხლართების გაბმის, არალეგალური საფორტიფიკაციო ინფრასტრუქტურის და საქართველოს მოქალაქეების უკანონო დაკავების ფაქტების თაობაზე.