საპარლამენტო უმრავლესობის წევრი გია ვოლსკი ტელეკომპანია „რუსთავი 2“-ში მოსასმენი მოწყობილობების აღმოჩენის ფაქტს ეხმაურება.

„ნიუპოსტთან“ საუბარში ვოლსკი მიიჩნევს, რომ აღნიშნული საკითხი შესასწავლია.

„რასაკვირველია საკითხი შესასწავლია და ამაზე ალბათ გაკეთდება შესაბამისი განცხადება მათგან, ვის მიმართაც „რუსთავი2“-მა ბრალდება გააჟღერა. სხვათაშორის არც წარსულში და არც აწყმოში არ მინახავს, რომ „რუსთავი 2“-ის წინააღმდეგ რაიმე გაკეთებულიყოს. „რუსთავი2“-ისგან კი ხშირად მახსოვს ზოგჯერ ისეთი დეზინფორმაცია, რომელიც გაგაოგნებს. ისეთი პოლიტიკური შემოტევაა, ნამდვილად იფიქრებ, რომ ეს ტელეკომპანია არის პოლიტიკური მხარე. რეალურად, „რუსთავი 2“ დაჩაგრული არავის უნახავს და „რუსთავი 2“ -ისგან „დაჩაგრული“ და მიწასთან გასწორებული ბევრს“, - განაცხადა გია ვოლსკიმ.

ტელეკომპანია "რუსთავი2"-ის გენერალური დირექტორის, ნიკა გვარამიასა და საინფორმაციო სამსახურის უფროს, ნინო შუბლაძის სამუშაო კაბინეტებში მოსასმენი მოწყობილობები აღმოაჩინეს. ჩანაწერები სავარაუდოდ გასული წლის ივნისშია გაკეთებული.