ფულე: ,,სად არის რუსეთის ქმედებების ბოლო - კიევთან, კიშინიოვთან თუ თბილისთან?"

პოლიტიკა - 16:59, 05 May, 2014

1501

ევროკომისარმა გაფართოებისა და სამეზობლო პოლიტიკის საკითხებში შტეფან ფულემ რადიო "თავისუფლებასთან" ინტერვიუში შემდეგი კითხვ დასვა: სად არის რუსეთის ქმედებების ბოლო - კიევთან, კიშინიოვთან თუ თბილისთან?
საუბრის თემა აღმოსავლეთ პარტნიორობის ინიციატივა და ის ნაბიჯები იყო, რომელსაც რუსეთი ინიციატივაში მონაწილე ქვეყნების ევროკავშირში ინტეგრაციის პროცესის შესაფერხებლად დგამს.
როგორც შტეფან ფულემ განაცხადა, თავდაპირველად ევროკავშირმა აღმოსავლეთ პარტნიორობაში ჩართვა რუსეთსაც შესთავაზა, თუმცა უარი მიიღო. ბრიუსელის შემდეგი წინადადება იყო გარკვეული არაფორმალური ჩარჩოს შექმნა, რომლის ფარგლებშიც რუსეთი ინფორმირებული იქნებოდა აღმოსავლეთ პარტნიორობის პოლიტიკის შესახებ.
შტეფან ფულეს განცხადებით, როდესაც დაიწყო საუბრები იმის შესახებ, რამდენად შეთავსებადია ერთმანეთთან ევროკავშირის აღმოსავლეთ პარტნიორობა და ევრაზიული კავშირი, დასავლეთმა შესთავაზა კონსულტაციები, რათა ევროპაში ახალი გამყოფი ხაზი არ გაჩენილიყო.
ევროკომისრის თქმით, როგორც ჩანს, მოსკოვის უარი ამ შეთავაზებებზე, დიდი ხნით ადრე იყო გადაწყვეტილი.
"ჩვენ მხოლოდ ახლა ვხედავთ მთლიან სურათს და უკეთ გვესმის, რატომ აცხადებდა ვლადიმერ პუტინი წლების წინ, რომ საბჭოთა კავშირის დანგრევა მე-20-ე საუკუნის ყველაზე დიდი კატასტროფა იყო და რატომ ითქვა 2008 წლის ბუქარესტის სამიტისას ნატო-რუსეთის საბჭოს სხდომაზე, რომ უკრაინა ხელოვნური სახელმწიფოა. ასოცირების შეთანხმებების პროცესს ჩვენი პარტნიორების სუევერენიტეტის 1%-ც არ მიაქვს, ის არ აყენებს არჩევანს მოსკოვსა და ბრიუსელს შორის. ის აძლიერებს მათ შესაძლებლობებს, მიიღონ სუვერენული გადაწყვეტილება თავიანთი ორიენტაციის შესახებ, როდესაც საბაჟო კავშირს მისი წევრი ქვეყნების სუვერენიტეტის ნაწილი მოსკოვში გადააქვს", - განაცხადა ფულემ.
მისივე თქმით, ის შეწუხებულია პროპაგანდით, რომელსაც მოსკოვი ახორციელებს, მათ შორის უკრაინაში მიმდინარე მოვლენებისას.
"მე ძალიან მაწუხებს ეს პროპაგანდა, რომელიც ერთი იზოლირებული ჯგუფიდან ქმნის მთლიან სურათს იმისა, რაც ხდება უკრაინის დასავლეთ ნაწილში. ყირიმში არალეგიტიმური რეფერენდუმის დროს იყო წარმოდგენილი ორი რუკა _ ერთი ფაშისტური ემბლემით და მეორე რუსეთის დროშის ფერებში. როდის აპირებს კრემლი დაამთავროს ეს პროპაგანდა? ყირიმი, როგორც ჩვენ ვხედავთ აღმოსავლეთ უკრაინის მაგალითზე, არ არის ამ ყველაფრის ბოლო და სად იქნება ბოლო - კიევთან, კიშინიოვთან, თბილისთან თუ სად?!", - აღნიშნა ფულემ.
მისივე თქმით, ის, რაც აღმოსავლეთ ევროპაში ხდება, ევროკავშირს უფრო ერთსულოვანს ხდის და თუ რუსეთი დღევანდელ კურსს გააგრძელებს, გაგრძელდება ევროკავშირის მიერ რუსეთის იზოლაციის პოლიტიკაც, მათ შორის, სანქციების მესამე ეტაპი ამოქმედდება.