ზაქარეიშვილი: ახალგორის მიმართულებით მოძრაობა გახსნილია

პოლიტიკა - 16:42, 05 May, 2014

1408

შერიგებისა და სამოქალაქო თანასწორობის საკითხებში სახელმწიფო მინისტრის, პაატა ზაქარეიშვილის განცხადებით, ახალგორის მიმართულებით მოძრაობა ამ დროისთვის გახსნილია, თუმცა გადაადგილების საშუალება მხოლოდ მათ აქვთ, ვისაც ე.წ. ოსური პასპორტი და ახალი ე.წ. საშვები აქვს აღებული.
მინისტრის განცხადებით, აღნიშნული დოკუმენტი ახალგორელების დიდ ნაწილს არ აქვს და ამიტომ ისინი რაიონიდან გამოსვლისგან თავს იკავებენ.
"რაიონში შესვლა საოკუპაციო რეჟიმმა 30 აპრილის საღამოდან შეზღუდა და ეს შეზღუდვა დღეს დილით უნდა მოხსნილიყო. მიმოსვლა დილით ჯერ კიდევ არ იყო აღდგენილი და გამშვები საგუშაგო მოგვიანებით გაიხსნა. ამის მიუხედავად, გადაადგილების საშუალება მხოლოდ მათ აქვთ, ვისაც ე.წ. ოსური პასპორტი და ახალი ე.წ. საშვები აქვს აღებული. ეს დოკუმენტი კი ახალგორელების დიდ ნაწილს არ აქვს და ამიტომ ისინი თავს იკავებენ რაიონიდან გამოსვლისგან. ასევე, გვაქვს ინფორმაცია, რომ მიმდინარეობს ამ ე.წ. საშვების გაცემის პროცესი. აქვე აღვნიშნავთ, რომ ვრცელდება ინფორმაცია, რომ თითქოს, ახალგორელებს ამ დოკუმენტის აღებისას საქართველოს მოქალაქობის დათმობა უხდებათ. საქართველოს კანონმდებლობით, საქართველოს მოქალაქობის დათმობა მხოლოდ სხვა სახელმწიფოს მოქალაქეობის მიღებისას ხდება. შესაბამისად, საქართველოს მოქალაქეობის დათმობის შესახებ არანაირი ეჭვის საფუძველი არ შეიძლება, არსებობდეს", - აღნიშნა ზაქარეიშვილმა.
მისივე თქმით, როგორც მისთვის ცნობილია, უახლოეს დღეებში საოკუპაციო რეჟიმი კიდევ გეგმავს ორი დღით რაიონში შესვლის შეზღუდვას - 8 მაისის საღამოდან 11 მაისის საღამომდე.
"სამწუხაროდ, საოკუპაციო რეჟიმი ასეთ შეზღუდვებს პერიოდულად სხვადასხვა მიზეზით აწესებს. არსებული რთული ვითარების მიუხედავად, ჩვენი მთავარი ამოცანაა, ახალგორში მოსახლეობას ცხოვრებისა და გადააგილებისთვის აუცილებელი პირობები შევუნარჩუნოთ", - განაცხადა მინისტრმა.