გიორგი მღებრიშვილი: “ინტერტრანსმა” ნაკისრი ვალდებულებები დღემდე ვერ შეასრულა

პოლიტიკა - 15:35, 05 May, 2014

1272

ქვემო ქართლის გუბერნატორმა გიორგი მღებრიშვილმა რუსთავის სამარშრუტო ტაქსების ტენდერში გამარჯვებული კომპანიის მისამართით განაცხადა, “ინტერტრანსმა” ნაკისრი ვალდებულებები დღემდე ვერ შეასრულა.

“ჩვენ არაერთხელ შევასრულეთ მედიატორის როლი მძღოლებსა და გამარჯვებულ კომპანიას შორის. ვეცადეთ, ჩამოვყალიბებულიყავით და კონკრეტულ პირობებზე შევთანხმებულიყავით, მაგრამ სამწუხაროდ, ეს დღემდე ვერ მოხერხდა. იმასაც გეტყვით, რომ კომპანიის მხრიდან, რაღაც გაუგებარი შეთავაზებები კეთდება, რაც ჩვენთან შეთანხმებული არ არის”, - განაცხადა მღებრიშვილმა.
გუბერნატორის თქიმით, კომპანიის ვალდებულებებში მძღოლების დასაქმება შედის. მღებრიშვილი აცხადებს, რომ სრულიად იზიარებს პრემიერის პათოსსა და მოსაზრებას.
რუსთავის მერის მოვალეობის შემსრულებელმა დავით ჯიქიამ აღნიშნა, რომ კომპანია “ინტერტრანსს” ნაკისრი ვალდებულებების მხოლოდ 20-30% აქვს შესრულებული.
რუსთავში განვითარებულ მოვლენებთან დაკავშირებით პრემიერ-მინისტრმა ირაკლი ღარიბაშვილმა ქვემო ქართლის გუბერნატორ გიორგი მღებრიშვილთან, რუსთავის მერის მოვალეობის შემსრულებელ დავით ჯიქიასა და მერიის ადმინისტრაციის წარმომადგენლებთან შეხვედრა გამართა.

პრემიერმა კომპანია “ინტერტრანსს” ნაკისრი ვალდებულებების დროული შესრულებისა და ადამიანების დასაქმებისკენ მოუწოდა.