ეკა ბესელია: ,,დღეს მოქმედ კონსტიტუციაში არის პრობლემა. აღსადგენია ბალანსი"

პოლიტიკა - 12:44, 05 May, 2014

1303

დღეს მოქმედ კონსტიტუციაში არის პრობლემა. აღსადგენია ბალანსი", - ამის შესახებ ჟურნალისტებს დეპუტატმა ეკა ბესელიამ განუცხადა, რომელიც სახელმწიფო საკონსტიტუციო კომისიის ფარგლებში არსებული შესაბამისი სამუშაო ჯგუფის წევრია. ბესელიას თქმით, ქართული კონსტიტუციური მოდელი მსოფლიოში არც ერთ მოდელს არ ჰგავს, არის ერთგვარი აღრევა, რაც"სააკაშვილის ექსკლუზიური მოდელია".

"მთავარი გამოწვევა არის პრეზიდენტს, მთავრობასა და პარლამენტის ინსტიტუციებს შორის ბალანსის აღდგენა. მთავრობას უნდა ჰქონდეს ძალიან მკაფიოდ გაწერილი ფუნქცია. ასევე ძალიან მკაფიოდ უნდა იყოს ჩამოყალიბებული პრეზიდენტის უფლებამოსილება და პარლამენტის, როგორც დამოუკიდებელი ინსტიტუტის. ამ ინსტიტუტს შორის არ უნდა არსებობდეს უფლება-მოვალეობების გადაკვეთა. მათი ურთიერთქმედება უნდა იყოს დაბალანსებული. დღეს მოქმედ კონსტიტუციაში არის პრობლემა. აღსადგენია ბალანსი", - განუცხადა ჟურნალისტებს ეკა ბესელიამ და დასძინა, რომ კონსტიტუციაში პრობლემატურია საკითხები, რომელიც იმპიჩმენტს და უნდობლობის პროცედურებს ეხება. ბესელიამ ხაზი გაუსვა, რომ არსებული პროცედურები იმპიჩმენტის და უნდობლობის გამოყენების მექანიზმებს უმოქმედოს ხდის.

"საბოლოოდ ჩვენ უნდა ჩამოვყალიბდეთ, თუ რა ტიპის მოდელისაკენ მივდივართ. ეს არის შერეული მოდელი, ეს არის რაღაც მიქსი - საპარლამენტო და საპრეზიდენტო მოდელების ნაჯვარი. საბოლოოდ კი, ძალიან რთულია დაადგინო, რა ტიპის მოდელი მოქმედებს. მე ვიტყოდი, რომ გვაქვს სააკაშვილის ექსკლუზიური მოდელი და ქართული კონსტიტუცია მსოფლიოში არც ერთ კონსტიტუციას არ ჰგავს. ჩვენ უნდა გადავწყვიტოთ, მივდივართ საპარლამენტო რესპუბლიკის მოდელისაკენ, სადაც პრეზიდენტის ინსტიტუტი იქნება როგორ სიმბოლო, თუ ვცვლით ამგვარ მოდელს და ვქმნით ისეთი ტიპის მოდელს, სადაც პარლამენტიც და პრეზიდენტიც თავისი უფლებამოსილებების ფარგლებში შეიძლება იყოს დაბალანსებული, როგორც ეს ადრე იყო", - აღნიშნა ეკა ბესელიამ.