"ერთიანი ნაციონალური მოძრაობის“ პოლიტსაბჭოს წევრი გიგა ბოკერია ანტიდისკრიმინაციული კანონის მიღებას ეხმაურება. როგორც გადაცემა „ფოკუსში“ ბოკერიამ განაცხადა, აღნიშნულ კანონთან დაკავშირებით სასულიერო პირებმა მკაფიო სამოქალაქო პოზიცია გამოიჩინეს.

"ამ ადამიანთა ერთ ჯგუფს, შესაძლოა გულწრფელად, მაგრამ რა თქმა უნდა, ეს არ არის გამართლება, საერთოდ არ სურთ იმ ღირებულებების მიღება, რომ ყველა არის თანასწორია, და რომ ის ადამიანები, ვინც მათი ზნეობრივი შეხედულების მიხედვით, "არასწორად ცხოვრობენ", ამ ადამიანების განხილვა, როგორც სრულფასოვანი ადამიანების, არ შეიძლება. გესმით ხოლმე ალბათ ეს ფრაზები, - სახლში რაც უნდათ ის ქნან, თავში ქვა უხლიათ... სხვათაშორის მმართველი პარტიის დეპუტატებიც ასე საუბრობენ. მერე შეცდომაში შეყვანას ცდილობდნენ ამ ხალხის მმართველი გუნდის დეპუტატები და ამბობდნენ, არაფერს არ ვაკანონებთ. ის რაზეც ამდენი ხანი იყო ლაპარაკი, სექსუალურ უმცირესობებზე, ეს კანონიერია მრავალი წელია უკვე საქართველოში და კარგა ხანია საბჭოთა წარსული ჩაბარდა წარსულს", - განაცხადა ბოკერიამ.

მისივე თქმით, ამ კანონის მოწინააღმდეგების ერთ ნაწილს გულწრფელი, თუმცა მისთვის მიუღებელი პოზიცია აქვს, თუმცა არსებობს მეორე ნაწილი, რომლის მოქმედებებიც უშუალოდ გეოპოლიტიკას უკავშირდება.

"ის პოლიტიკური პარტიები, რომლებიც ყველაზე მეტს აქტიურობენ, აბსოლუტურად უზნეოდ და უსინდისოდ, ვგულისხმობ მაგალითად ქალბატონ ნინო ბურჯანაძის პარტიას, ეს ის ხალხია, რომელიც პუტინთან დადიოდა და რაღაც სიგიჟეეებს და ტყუილებს იგონებენ და მათ შორის ისეთ ქმედებებს, რომლებიც დასჯადია ყველგან, ადარებენ პიროვნულ არჩევანს ან სექსუალურ ორიენტაციას, რომელიც არჩევანი არ არის და პიროვნების იდენტობის ნაწილია. ეს ყველაფერი უკავშირდება არა მხოლოდ ასოცირების ხელშეკრულებას და ტექნიკურად მის ხელმოწერას, რომელიც მე იმედი მაქვს მოხდება და მნიშვნელოვანი მოვლენაა. ეს უფრო გრძელვადიანი ბრძოლაა ღირებულებების წინააღმდეგ”, - განაცხადა ბოკერიამ.