"საჩხერეს "საგარეო პოლიტიკური დოქტრინის" ჭუჭრუტანიდან მსოფლიო სხვანაირად გამოიყურება"

პოლიტიკა - 21:47, 02 May, 2014

2236

ალბათ საჩხერეს "საგარეო პოლიტიკური დოქტრინის" ჭუჭრუტანიდან მსოფლიო სხვანაირად გამოიყურება, აღნიშნულ განცხადებას სოციალურ ქსელში ყოფილი საგარეო საქმეთა მინისტრი გრიგოლ ვაშაძე წერს.
"წინასწარმეტყველები არ ვართ, უბრალოდ ფაქტები თვითონ მეტყველებენ იმაზე, რა მოვლენები ვითარდება ევროპის ცენტრში. 2014 წლის 2 მარტს "ივერიაზე" ითქვა: "რუსეთს ომი... უკვე დაწყებული აქვს. კიდევ ერთხელ მათთვის, ვისაც არ ესმის, რა ხდება: უკრაინაში რუსეთმა, სამხედრო აგრესიის აქტის განხორციელებით, ომი დაიწყო". დღეს სლავიანსკში რუსული იარაღით, მათ შორის ПЗРК-თი (!), კბილებამდე შეიარაღებული, ეუთო-ს დამკვირვებლების მძევლად ამყვანი (!!!), უკრაინის სახელმწიფოს ტერიტორიული მთლიანობის ხელმყოფი რუსი ტერორისტები უკრაინის სამართალდამცავებს ხოცავენ. უკრაინის ქალაქებში რუსი კოლაბორაციონისტების მეხუთე კოლონაა ამოქმედებული. გორლოვკაში სახელისუფლებო შენობებს იღებენ. ოდესაში ცენტრალური ხელისუფლების მხარდამჭერ მშვიდობიან დემონსტრაციას თავს ესხმიან. უკრაინის მიერ განხორციელებულ ანტიტერორისტულ ოპერაციას რუსეთის საგარეო საქმეთა სამინისტრო "ფაშიზმის გამოვლინების" იარლიყის მიწეპებას ცდილობს. დღეს წყდება საკითხი, არის თუ არა "პოსტსაბჭოთა" სივრცე რუსეთის განსაკუთრებული ინტერესების სფერო, თუ ამ სივრცეში მცხოვრებ ერებს უფლება აქვთ თვითონ განსაზღვრონ თავისი მომავალი. ამ ფონზე საქართველოს საგარეო საქმეთა სამინისტრო "ყველაზე წარმატებულ საგარეო პოლიტიკურ წელს" გვპირდება. ამათ მართლა არ ესმით, რა ხდება. ალბათ საჩხერეს "საგარეო პოლიტიკური დოქტრინის" ჭუჭრუტანიდან მსოფლიო სხვანაირად გამოიყურება“, – წერს ვაშაძე სოციალურ ქსელში.