საგარეო საქმეთა სამინისტრო საქართველოს მოქალაქეებს აფრთხილებს სლავიანსკში ფართომასშტაბიანი ანტიტერორისტული სპეცოპერაციის გამო, უკრაინაში გამგზავრებისგან თავი შეიკავონ.

მაია ფანჯიკიძის თქმით, ქართული მხარე, ისევე როგორც მთელი მსოფლიო, შეშფოთებით ადევნებს თვალყურს უკრაინაში მიმდინარე მოვლენებს.

"განსაკუთრებით შეწუხებულები ვართ იმის გამო, რომ ადამიანები იღუპებიან. ამიტომ კიდევ ერთხელ საერთაშორისო თანამეგობრობასთან ერთად მოვუწოდებთ ყველას, ვინც ამ სისხლისღვრაშია ჩართული, შეწყვიტოს სამხედრო მოქმედებები და კონფლიქტი მოლაპარაკებების მაგიდასთან გადაწყვიტონ", - განაცხადა მაია ფანჯიკიძემ.

მისი ინფორმაციით, საგარეო უწყება აღნიშნულ საკითხზე დღეს გაავრცელებს განცხადებას და საზოგადოებას სიფრთხილისკენ მოუწოდებს.

"ჩვენ მოვუწოდებთ ჩვენს მოქალაქეებს არ გაემგზავრონ კონფლიქტურ რეგიონებში და თუკი უკვე იქ არიან, იყვნენ ფრთხილად და დახმარების თხოვნით მიმართონ საქართველოს საელჩოს და საკონსულოებს, თუკი ამის საჭიროება იქნება", - განაცხადა მაია ფანჯიკიძემ.