ახალგორში არსებულ პრობლემას მაია ფანჯიკიძე გამოეხმაურა

პოლიტიკა - 11:37, 02 May, 2014

1966

ახალგორში განვითარებულ მოვლენებთან დაკავშირებით კომენტარს საგარეო უწყების ხელმძღვანელი მაია ფანჯიკიძე აკეთებს.
როგორც მინისტრმა დღეს ჟურნალისტებს განუცხადა, საჭიროების შემთხვევაში სამინისტრო საკითხის მოგვარების პროცესში ჩაერთვება.
"შსს მუშაობს ამ საკითხზე. ჩვენ მათთან ვიმყოფებით კოორდინაციაში. საჭიროების შემთხვევაში ჩავერთვებით ამ საკითხის მოგვარებაში ჩვენი არხებით, რომელიც გაგვაჩნია რუსეთის ფედერაციასთან სალაპარაკოდ, მაგალითად, აბაშიძე– კარასინის ფორმატით, რომელმაც ეფექტურად იმუშავა, როცა ჟურნალისტები იყვნენ გატაცებულნი“, - განაცხადა ფანჯიკიძემ.

ცხინვალის ე.წ. ადმინისტრაციამ ახალგორის მიმართულებით ყველა ტიპის ტრანსპორტის მოძრაობა გუშინ დილიდან აკრძალა.

გავრცელებული ინფორმაციით, აკრძალვა ორშაბათამდე იმოქმედებს. დე ფაქტო რესპუბლიკის ადმინისტრაციის გადაწყვეტილებით, გუშინ ახალგორის მიმართულებით, საშვთა ახალი სისტემა უნდა ამოქმედებულიყო, თუმცა მოსახლეობის დიდ ნაწილს ახალი საშვი ჯერ არ მიუღია.

უსაშვოდ დარჩენილთა შორის წეროვანში მცხოვრები ის დევნილები არიან, რომელთა საცხოვრებელი სახლებიც ოკუპირებულ ტერიტორიაზეა დარჩენილი და ამ სამი წლის განმავლობაში ფორმა #9-ს მეშვეობით მოძრაობდნენ.

ფორმა # 9 კი, რომლითაც მოსახლეობა ოკუპირებული ტერიტორიის მიმართულებით გადაადგილებისას სარგებლობდა, ძალადაკარგულად არის გამოცხადებული.