თავდაცვის ყოფილი მინისტრი გეგმა „ბ“-ს გასაჯაროვებას დღეს გეგმავს. გამომდინარე იქიდან, რომ ირაკლი ოქრუაშვილს კანონით უფლება არ აქვს გორის მერობაზე კენჭი იყაროს, ის საკუთარი პარტიის კანდიდატს დაასახელებს.

„ნიუპოსტის“ ინფორმაციით, აღნიშნული კანდიდატი „ქართული პარტიის“ ერთ-ერთი აქტიური წევრი კახა ერგემლიძეა. თავდაცვის ექს-მინისტრი იმედოვნებს, რომ მის მიერ დასახელებული კანდიდატი არჩევნებში გაიმარჯვებს და თავად ის გორის ვიცე-მერი გახდება.

„ქართული პარტიის“ მიერ საკუთარ კანდიდატად კახა ერგემლიძის დასახელების შესახებ „ნიუპოსტი“ ჯერ კიდევ მაშინ წერდა, როდესაც ირაკლი ოქრუაშვილმა განაცხადა, რომ გორის მერობაზე კენჭისყრას აპირებდა. თუმცა, მას შესაბამისი კანონი ამის უფლებას არ აძლევს.

რაც შეეხება კახა ერგემლიძეს, ის ამჟამად “ქართული პარტიის” გორის რაიონული ორგანიზაციის თავმჯდომარეა. 2011 წელს მას ერთთვიანი ადმინისტრაციული პატიმრობა ჰქონდა მისჯილი. საპატრულო პოლიციამ ის ღერძულა ხაზის გადაკვეთის საბაბით გააჩერა, დაკავების მიზეზად კი სამართალდამცავებმა ალკოჰოლის ტესტის გავლაზე უარის თქმა დაასახელეს.

გიორგი ახალკაცი, გორი „ნიუპოსტი“