ნინო ლომჯარია ღარიბაშვილს "ცრუ ბრალდებების" გამო ბოდიშის მოხდისკენ მოუწოდებს

პოლიტიკა - 10:43, 02 May, 2014

1961

არასამთავრობო ორგანიზაცია „სამართლიანი არჩევნებისა და დემოკრატიის საერთაშორისო საზოგადოების" თავმჯდომარე ნინო ლომჯარია მიიჩნევს, რომ ირაკლი ღარიბაშვილმა გუშინდელი განცხადებების გამო ბოდიში უნდა მოიხადოს.

„როდესაც ქვეყნის ლიდერი, რომელსაც აქვს ნდობა საზოგადოებაში მსგავსი ცილისმწამებლური შეფასებებით ახასიათებს არასამთავრობო სექტორს. ეს, რა თქმა უნდა, აჩენს საზოგადოებაში მათ მიმართ ნეგატიურ განწყობებს, ამიტომ, მე ველოდები და ვფიქრობ, რომ ირაკლი ღარიბაშვილი გააკეთებს თავის განმარტებებს, ან სულ მცირე მოიხდის ბოდიშს იმ განცხადებებთან და ცრუ ბრალდებებთან დაკავშირებით რაც მან ჩვენი მისამართით გაკეთა“, - განაცხადა ნინო ლომჯარიამ.

პრემიერმა მთავრობის გუშინდელ სხდომაზე, უკანონო მოსმენების წინააღმდეგ მიმართული კამპანია - ”ეს შენ გეხება, ისევ გვისმენენ” - რომელსაც არასამთავრობო ორგანიზაციები წარმართავენ, ქვეყნის იმიჯის ძირგამომთხრელ საქმიანობად შეაფასა. მან ასევე თქვა, რომ კანონპროექტის ვარიანტი, რომელიც არასამთავრობო ორგანიზაციებმა და ერთიანი ნაციონალური მოძრაობის წარმომადგენლებმა წარმოადგინეს, კატასტროფის ტოლფასი იყო და მთლიანად სამართალდამცავი სისტემის, ქვეყნის უსაფრთხოების სისტემის გამართულ, ეფექტურ მუშაობას საფრთხეს შეუქმნიდა.