ოპერისა და ბალეტის დასის წევრების აქცია კულტურის სამინისტროსთან გრძელდება

პოლიტიკა - 18:59, 01 May, 2014

685

ოპერისა და ბალეტის თეატრის დასის წევრები კულტურის სამინისტროს დატოვებას არ აპირებენ ვიდრე მინისტრი მათი მიერ არჩეულ სამხატვრო ხელმძღვანელს თანამდებობაზე არ დაამტკიცებს.

კულტურის სამინისტროს შენობის წინ ოპერისა და ბალეტის დასის თანამშრომელთა აქცია გრძელდება. აქციაში 30-ზე მეტი პირი მონაწილეობს. მათ კულტურის სამინისტროდან მინისტრის მოადგილე ბადრი ბაგრატიონ-გრუზინსკი გამოეხმაურა.

როგორც ჟურნალისტებთან საუბრისას მინისტრის მოადგილემ განაცხადა, დავით კინწურაშვილის სამხატვრო ხელმძღვანელად დანიშვნასთან დაკავშირებით, გადაწყვეტილება მიღებულია. მისი ინფორმაციით, მინისტრი გურამ ოდიშარია დავით კინწურაშვილს გასული კვირის პარასკევს შეხვდა და მათ ამ საკითხზე ისაუბრეს.

"ოპერისა და ბალეტის თეატრში ჩატარდა არჩევნები, დასმა აირჩია თავისი სამხატვრო ხელმძღვანელი. როგორ გგონიათ, მინისტრი არ მოაწერს ხელს?! უარვყოფ, რომ ეს პროცესი ხელოვნურად ჭიანურდება", - აღნიშნა ბადრი ბაგრატიონ-გრუზინსკიმ და ის მიზეზები დაასახელა, რატომ არ მოხდა დღემდე დასის მიერ არჩეული სამხატვრო ხელმძღვანელის თანამდებობაზე დამტკიცება.

მინისტრის მოადგილის განმარტებით, მიზეზი ის, არის რომ მინისტრი გურამ ოდიშარია შვებულებაში იმყოფებოდა, შემდეგ მივლინებებში. დღეს კი ოდიშარია სამსახურში არ იმყოფება. ხვალ კი ქუთაისში უნდა ჩავიდეს, საიდანაც, რამდენიმე დღის შემდეგ დაბრუნდება და ოპერისა და ბალეტის თეატრის სამხატვრო ხელმძღვანელის თანამდებობაზე დავით კინწურაშვილის დანიშვნასთან დაკავშირებით ბრძანებას ხელს მოაწერს.
კულტურის სამინისტროს შენობის გარეთ მყოფი აქციის მონაწილეები მინისტრის მოადგილის ასეთმა პასუხმა გააღიზიანა. ისინი ელოდებიან პასუხს კულტურის სამინისტროდან და არ აპირებენ დაშლას, სანამ სამინისტროს ხელმძღვანელობა არ დაასახელებს თარიღს, როდის მოაწერს მინისტრი ხელს სამხატვრო ხელმძღვანელის დანიშვნასთან დაკავშირებით ბრძანებას.