პეტრიაშვილი: თავდაცვის მინისტრს მის ინიციატივაზე ვაშინგტონსა და ბრიუსელში კონსულტაციები ექნება

პოლიტიკა - 17:45, 01 May, 2014

1434

ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის ალექსი პეტრიაშვილის განცხადებით, ნატო-ს გენერალური მდივნის სპეციალურ წარმომადგენელთან კავკასიასა და ცენტრალურ აზიაში ჯეიმს აპატურაისთან შეხვედრაზე ირაკლი ალასანიას ინიციატივა დეტალებში არ განხილულა.

პეტრიაშვილის თქმით, შეხვედრაზე ისინი უფრო პოლიტიკურ თემატიკას შეეხნენ, განიხილეს რეგიონში უსაფრთხოების საკითხები და ის თუ რა შესაძლო პროგრესი შეიძლება იყოს მიღწეული უელსის სამიტზე.
"კიდევ ერთხელ მინდა ხაზგასმით აღვნიშნო, ნატო-შიც არის ერთსულოვნება, რომ საქართველოს მიერ დემონსტრირებული პროგრესი და მიღწევები უსაფრთხოების სფეროში კონტრიბუციის გამო უნდა დაფიქსირდეს უელსის სამიტზე. ახლა მიმდინარეობს მოლაპარაკებები ალიანსის წევრებს შორის. ძალიან მნიშვნელოვანია ეს თვეები, ეს პერიოდი და ასევე ძალიან მნიშვნელოვანია ვიზიტები, რომლითაც ჩამოდიან ჩვენთან და რომლითაც საქართველოს ხელისუფლება, პრემიერ-მინისტრი მიემგზავრება", - განაცხადა ალექსი პეტრიაშვილმა.

რაც შეეხება ალასანიას ინიციატივას, ალექსი პეტრიაშვილმა კიდევ ერთხელ აღნიშნა, რომ ახლა არ იქნება სწორი და კომპეტენეტური მისი მხრიდან ამ საკითხზე კომენტარის გაკეთება, რადგან ამას სჭირდება კონკრეტული ანალიზი, საკითხის შესწავლა და შემდეგ კონსულტაციები ნატოელ კოლეგებთან.

"ეს სრულებით ახალი საკითხია, რომელიც თავდაცვის მინისტრმა გააჟღერა და მას ამასთან დაკავშირებით ექნება კონსულტაციები აშშ-ში ვიზიტის დროს და ასევე ექნება კონსულტაციები ბრიუსელსა თუ სხვა დედაქალაქებში", - განაცხადა ალექსი პეტრიაშვილმა.
საქართველოს თავდაცვის მინისტრმა ირაკლი ალასანიამ ვაშინგტონში, ატლანტიკური საბჭოს მიერ ორგანიზებულ კონფერენციაზე სიტყვით გამოსვლისას განაცხადა, რომ დასავლეთმა უნდა გამოიყენოს შესაძლებლობა და თავად შექმნას რეალობა, შესთავაზოს ნატო-ს წევრობა ასპირანტ ქვეყნებს და განათავსოს იქ თავდაცვითი საშუალებები, განსაკუთრებით კი საქართველოში.