აფხაზეთის უმაღლეს საბჭოს საქართველოში უკრაინის საელჩოს პირველი მდივანი ალექსეი ვაილუპოვი ესტუმრა

პოლიტიკა - 17:29, 01 May, 2014

2769

აფხაზეთის უმაღლესი საბჭო საქართველოში უკრაინის საელჩოს პირველ მდივანს მასპინძლობდა, სადაც მხარეებმა უკრაინაში ბოლო დროს განვითარებულ მოვლენებსა და მოსალოდნელ საფრთხეებზე ისაუბრეს.
30 აპრილს გამართულ შეხვედრას უმაღლესი საბჭოს თავმჯდომარის მოადგილეები - დავით გვაძაბია, ჯემალ გამახარია, ფრაქციათა კოალიციის ”ქართული ოცნება - ერთიანი, დემოკრატიული, სამართლიანი საქართველო” თავმჯდომარე რაისა ქარაია, აპარატის უფროსი რევაზ გერგედავა და სხვები ესწრებოდნენ.
ალექსეი ვაილუპოვმა საქართველოსა და უკრაინის კონფლიქტების პარალელებსა და უკრაინის საელჩოს აფხაზეთის დევნილ ხელისუფლებასთან შემდგომი თანამშრომლობის აუცილებლობაზე ისაუბრა:

,,რამდენიმე დღის წინ უკრაინამ მიიღო კანონი ოკუპირებული ტერიტორიების შესახებ, ასევე იგეგმება მთავრობაში შესაბამისი უწყების შექმნა - ყირიმის საკითხებთან დაკავშირებით ვიცე-პრემიერის დანიშვნა, რომელიც საერთაშორისო დონეზე იმუშავებს ამ პრობლემებზე. ვინაიდან საქართველოს კონფლიქტი კონკრეტულად რუსეთთან ჰქონდა და ჩვენთვის ეს კრიზისი უცნობია, ძალიან მნიშვნელოვანი იქნება საქართველოს პოსტკონფლიქტური გამოცდილების გათვალისწინება”, - განაცხადა საქართველოში უკრაინის ელჩის მოადგილემ.

კითხვაზე - პროგნოზირებადია თუ არა უკრაინის გაყოფა, ვაილუპოვმა განაცხადა, რომ ქვეყნის ფედერალიზაციის საკითხი არავის ინტერესში არ არის.

,,მოსახლეობა ერთმნიშვნელოვანად აღიარებს უნიტარულ უკრაინას. თუ რატომ არ გამოიყენებს უკრაინა საქართველოსთან შედარებით გაცილებით ბრძოლისუნარიან არმიას დონეცკის ოლქში არა იარაღის გამოსაყენებლად, არამედ სტაბილურობის გასამყარებლად“,- არნიშნა ალექსეი ვალიუპოვმა და დასძინა, რომ აღმოსავლეთ უკრაინაში დაძაბულობის პროვოცირებას რუსეთიდან ჩამოსული მოქალაქეები ახდენდნენ, უკრაინის ხელისუფლებამ კი ჩათვალა, რომ ხალხის მიმართ ძალას არ გამოიყენებს.

საელჩოს პირველი მდივნის აზრით, ამ კრიზისის ყველაზე სავალალო შედეგი იქნენა, თუკი რუსეთი შეიჭრება უკრაინის მატერიკულ ნაწილში.

,,ჩვენ ვიმედოვნებთ, რომ ეს არ მოხდება. თუკი მაინც და მაინც რუსეთი გადადგამს ასეთ ნაბიჯს, უკრაინის შეიარაღებული ძალები სრულ მზადყოფნაშია იმისთვის, რომ უცხო ქვეყნის მოძალადეებს საკადრისი პასუხი გასცენ და იმავდროულად შეასრულონ კონსტიტუციური მოვალეობა ქვეყნის წინაშე.“

აფხაზეთის უმაღლესი საბჭოს წარმომადგენლებმა ხაზგასმით აღნიშნეს, რომ კონფლიქტურ სიტუაციებში მთავარი როლი ენიჭება საერთაშორისო თანამეგობრობასთან მჭიდრო თანამშრომლობას და არსებულ ვითარებაზე სწორი ინფორმაციის მიწოდებას ენიჭება. შეხვედრის დასასრულს, სტუმარმა წარმატებული თანამშრომლობისთვის მადლობა გადაუხადა უმაღლეს საბჭოს და სამომავლო შეხვედრებისა და კონსულტაციებისთვის მზადყოფნა გამოთქვა.