საქართველოს პარლამენტის თავმჯდომარე „მაუწყების შესახებ კანონში“ განხორციელებულ ცვლილებებას გამოეხმაურა, სადაც საზმაუწყებელის მონიტორინგის საბჭოს შექმნაზეა საუბარი. უსუფაშვილის თქმით, პარლამენტი აღნიშნული ცვლილებით ცდილობს ერთის მხრივ, გააგრძელოს საზოგადოებრივი მაუწყებლის რეფორმირების პროცესი და მეორეს მხრივ, აღასრულოს საკონტიტუციო სასამართლოს გადაწყვეტილება.

,,ჩვენ არ ვიზიარებთ, მაგრამ პატივს ვცემთ საკონტიტუციო სასამართლოს გადაწყვეტილებას. ამიტომ ცვლილებების პროექტი შედგენილია სწორედ იმგვარად, რომ ერთი მხრივ არ შეჩერდეს საზოგადოებრივი მაუწყებლის რეფორმის პროცესი და მეორე მხრივ, არ შეილახოს ის უფლებები, რომელზეც საკონსტიტუციო სასამართლო ბრძანებს", - განაცხადა დავით უსუფაშვილმა.

მისი თქმით, საზოგადოებრივი მაუწყებლის სამეურვეო საბჭოს მოქმედმა შემადგენლობამ, ბოლო ერთი წლის განმავლობაში ორჯერ "შეძლო მისივე არჩეული გენერალური დირექტორის თანამდებობიდან გათავისუფლება უკანონოდ".

უსუფაშვილის განცხადებით, ეს "უკანონობა" სასამართლოს გადაწყვეტილებებით არის დადასტურებული.

"ამიტომ, ბუნებრივია, რომ ასეთ სამეურვეო საბჭოს ჩვენ მომავალში ვერ ვანდობთ ტელევიზიის მართვას, რომელიც არის საბიუჯეტო დაწესებულება დაფინანსების კუთხით და გადამხდელების ფულიდან 35-40 მილიონამდე ლარს ხარჯავს წელიწადში", - განაცხადა პარლამენტის თავმჯდომარემ.

რაც შეეხება საბჭოს ძველ წევრებს, უსუფაშვილის თქმით, "ისინი რჩებიან მართვის სისტემაში, მაგრამ მონიტორინგის ძლიერი ფუნქციით, რაც დღესაც არა აქვთ."