"ჩვენი მთავრობა ყველაფერს აკეთებს იმისათვის, რომ ადამიანებს ჰქონდეთ ცხოვრების ღირსეული პირობები, იმისათვის, რომ მათ თავიანთი შრომით მიაღწიონ წარმატებებს, კეთილდღეობას,"-განაცხადა საქართველოს პრემიერ-მინისტრმა ირაკლი ღარიბაშვილმა სოციალური პარტნიორობის სამმხრივი კომისიის სხდომაზე. ირაკლი ღარიბაშვილმა მოქალაქეებს შრომის საერთაშორისო დღე მიულოცა.

სოციალური პარტნიორობის სამმხრივი კომისიის პირველი სხდომა, პრემიერ-მინისტრის ხელმძღვანელობით მთავრობის ადმინისტრაციაში გაიმართა. კომისიის წევრებმა განიხილეს მიმდინარე რეფორმები, რომლებიც შრომითი გარემოს განვითარებას შეუწყობს ხელს. ისაუბრეს მცირე და საშუალო ბიზნესთან მიმართებაში შრომითი რეგულაციების შესახებ, შრომითი ბაზრის ინსტიტუციონალიზაციის სფეროში არსებულ გამოწვევებზე, შრომით კოდექსში შესულ ცვლილებებზე.

საქართველოს პრემიერ-მინისტრის თქმით, აქამდე არსებული შრომის კოდექსი მხოლოდ დამსაქმებლის ინტერესებზე იყო მორგებული, იგი, პრაქტიკულად, კაბალურ პირობებში აგდებდა დასაქმებულს.

"ახლა ჩვენ გვაქვს შრომის კოდექსი, რომელიც პასუხობს საერთაშორისო სტანდარტებს. მაშინ, როცა ჩვენ მივისწრაფვით ევროპული ოჯახის ღირსეული წევრობისკენ, ასეთი ცვლილება პრინციპულად მნიშვნელოვანია ჩვენი ქვეყნისთვის.

მაგრამ აქვე მინდა აღვნიშნო, რომ მხოლოდ კანონი ვერ იქნება ჯანსაღი შრომითი ურთიერთობების გარანტი. შრომის მსოფლიო ორგანიზაციასთან და სხვა პარტნიორებთან ერთად ჩვენ ვმუშაობთ სპეციალური საზედამხედველო სამსახურის შექმნაზე, რომელიც კიდევ ერთი მექანიზმი იქნება ღირსეული, ჯანსაღი უსაფრთხო შრომითი გარემოს უზრუნველსაყოფად,"- აღნიშნა პრემიერმა.

მან კიდევ ერთ რეფორმაზე გაამახვილა ყურადღება. კერძოდ, ახლო მომავალში სრულფასოვნად ამოქმედდება შრომითი დავების მედიაციის ინსტიტუტი, რომელიც მნიშვნელოვნად დახვეწს შრომითი დავების დარეგულირების საკითხს. წელსვე მზად იქნება შრომის ბაზრის ფორმირების სტრატეგია, რომლის საფუძველზეც მოხდება, შრომით ბაზარზე არსებული მოთხოვნის თანახმად, სამუშაოს მაძიებლების შესაბამისი გადამზადება და გამარტივდება მათი დაკავშირება დამსაქმებელთან.

"ყველა რეფორმა, რომელზეც მოგახსენეთ, ასევე ხორციელდებადასაქმებულებისა და დამსაქმებლების უშუალო მონაწილეობით. დამთავრდა ის დრო, როდესაც სახელმწიფოში მხარეების ინტერესების იგნორირებით, ერთპიროვნულად მიიღებოდა გადაწყვეტილებები,"- განაცხადა ირაკლი ღარიბაშვილმა.

სოციალური პარტნიორობის სამმხრივი კომისიის სხდომას მთავრობის წევრები, დამსაქმებელთა და დასაქმებულთა გაერთიანებების წარმომადგენლები დაესწრნენ.