თეატრის მართვის სისტემაში სარეკომენდაციო საბჭო გაუქმდება

პოლიტიკა - 11:38, 01 May, 2014

1102

კულტურის სამინისტროსთან არსებული სარეკომენდაციო საბჭო, თეატრების მართვის სისტემაში აღარ იარსებებს. სარეკომენდაციო საბჭოს გაუქმებით სავალდებულო გახდება სამხატვრო საბჭოს გადაწყვეტილებები, რომლსაც უფლებამოსილებები გაეზრდება.

სამხატვრო საბჭოსთვის უფლებამოსილების გაზრდას "პროფესიული თეატრების შესახებ" კანონში დაგეგმილი ცვლილებები ითვალისწინებს, რომელიც დეპუტატებმა ზაზა პაპუაშვილმა და გედევან ფოფხაძემ მოამზადეს.

საკანონმდებლო ინიციატივის ავტორები კანონპროექტზე თანდართულ განმარტებით ბარათში სამხატვრო საბჭოების და დასის პოზიციების იგნორირებაზე საუბრობენ.

"თეატრის სამხატვრო საბჭოს შერჩევისას გაჩნდა აბსოლუტურად ზედმეტი რგოლი - კულტურის სამინისტროსთან არსებული სარეკომენდაციო საბჭოს სახით, რაც ზედმეტ ბიუროკრატიულ რგოლს წარმოადგენს. არ ხდება სამხატვრო საბჭოს და თეატრის პოზიციის გაზიარება. არ არსებობს თეატრში ეფექტური შიდა კონტროლის მექანიზმი და ბალანსი, რომელიც გამორიცხავს სამხატვრო ხელმძღვანელის ერთპიროვნულ, ზოგჯერ მიუღებელ გადაწყვეტილებებს და მეტიც, მის მიერ თეატრის ინტერესის უხეში დარღვევის შემთხვევაში, შესაბამისი სამართლებრივი რეაგირების შესაძლებელობას", - აცხადებენ კანონპროექტის ავტორები.

განმარტებით ბარათში აღნიშნულია ისიც, რომ შემოქმედებითი კოლექტივი დაცული უნდა იყოს პოლიტიკური კონიუნქტურისგან, არავის უნდა გაუჩნდეს თანამდებობაზე ყოფნის შეუცვლელობის განცდა და თეატრებში უნდა არსებობდეს თავისუფალი კონკურენციის შესაძლებლობა.

"კულტურის სამინისტრო თეატრების ზოგადი პოლიტიკის განმსაზღვრელი, მაგრამ უშუალოდ პოლიტიკის რეალიზაციაზე პასუხისმგებლობას თეატრის შემოქმედებითი კოლექტივი იკისრებს", - განმარტავენ კანონპროექტის ავტორები.

პარლამენტში ინიცირებული პროექტის მიხედვით, დგინდება ბალანსი მინისტრის, სამხატვრო ხელმძღვანელის, სამხატვრო საბჭოსა და თეატრის შემოქმედებით კოლექტივს – დასს შორის. თეატრებში პრობლემების გადაწყვეტისას სავალდებულო ხდება სამხატვრო საბჭოს და სამხატვრო ხელმძღვანელს შორის ურთიერთანამშრომლობა, შეუთანხმებლობის შემთხვევაში მედიატორი ხდება დასი. შემოქმედებითი კოლექტივები უშუალოდ მიიღებენ მონაწილეობას თეატრების ფორმირებაში.