ანტიდისკრიმინაციულ კანონპროექტთან დაკავშირებით დღეს სასულიერო პირებსა და უმრავლესობის წევრებს შორის დახურულ კარს მიღმა შეხვედრა გაიმართება.

ამის შესახებ ადამიანის უფლებათა დაცვის კომიტეტის თავმჯდომარემ ეკა ბესელიამ განაცხადა. მისი თქმით, შეხვედრას მხოლოდ საპატრიარქოს წარმომადგენლები დაესწრებიან, სადაც ანტიდისკრიმინაციული კანონპროექტი დაწვრილებით იქნება განხილული.

"გვირჩევნია, ეს შეხვედრა იყოს სასულიერო პირებთან, რადგან სასურველია საუბარი შედგეს იმათთან, რომლებსაც აქვთ შიში და განცდა, რომ ამ კანონში რაღაც ისეთი წერია, რომელიც საფრთხის შემცველია. მათ განვუმარტავთ, რომ საფრთხის შემცველ ნორმებს ჩვენ არ ჩავდებთ ამ კანონში. გარკვეული ცვლილებებიც, რომელიც მეორე მოსმენით მზადდებოდა, ამ კანონში უკვე ასახული იქნება. საპატრიარქოს სახელით საუბრობს მისი უწმინდესობა და პატრიარქის მიერ სპეციალური უფლებამოსილებით აღჭურვილი პირი. მაგრამ როგორც ჩემთვის არის ცნობილი, სასულიერო პირები, რომლებიც ესწრებოდნენ წინა სხდომას და რომლებიც ხვალაც შესაძლოა იყვნენ შეხვედრაზე, საუბრობენ თავიანთი სახელით. მაგრამ ამას ხაზგასმა ნაკლებად სჭირდება, რადგან საზოგადოების სხვა ჯგუფიც რომ იყოს, რომელსაც უნდა შეხვედრა, ვალდებული ვართ დაველაპარაკოთ მათაც", - აღნიშნა ეკა ბესელიამ.