საქართველოს პრეზიდენტი ყირიმში განვითარებულ მოვლენებს კიდევ ერთხელ გამოეხმაურა და აღნიშნა, რომ დასავლეთის სანქციები რუსეთის მიმართ კიდევ უფრო უნდა გაძლიერდეს.

როგორც გადაცემა „პირველ სტუდიაში“ მარგველაშვილმა განაცხადა, ყირიმის საკითხი საერთაშორისო დისკუსიებში მაღლა უნდა იდგეს და ამავე კონტექსტში მაღლა უნდა ავიდეს საქართველოს საკითხიც.

"სანქციები უნდა გაძლიერდეს, გაღრმავდეს და იყოს არა მხოლოდ მოკლე პერიოდით, არამედ დროში გავრცობილი. უკრაინის, ყირიმის საკითხი ყოველთვის ძალიან მაღლა უნდა იდგეს საერთაშორისო დისკუსიების დღის წესრიგში და საქართველოს საკითხი ამავე კონტექსტში ძალიან მაღლა უნდა ავიდეს. სანქციების გაღრმავებასა და მეთოდურ განხორციელებას ცდილობს დასავლეთი. ამ თვალსაზრისით, ჩვენ მხარს ვუჭერთ დასავლელ პარტნიორებს, რადგან მიგვაჩნია, რომ მათ სწორი პოზიცია აქვთ და რეალურად, მარტო პირისპირ არ უნდა დავრჩეთ რუსეთთან, არამედ მუდმივად პარტნიორებთან ერთად უნდა ვისაუბროთ", - განაცხადა პრეზიდენტმა.