საქართველოს პრეზიდენტის თქმით, საქართველო ოკუპაციას არასოდეს შეეგუება და აუცილებლად იქნება ტერიტორიულად მთლიანი და სუვერენული სახელმწიფო.

როგორც გიორგი მარგველაშვილმა გადაცემა „პირველ სტუდიაში“ სტუმრობისას განაცხადა, ტერიტორიული მთლიანობასთან დაკავშირებული საკითხების მოგვარების შემდეგ საქართველოს რუსეთთან მტრული ურთიერთობა არ ექნება.

“მე მესმის, რომ ჩვენ ემოციური ხალხი ვართ მაგრამ, ხომ არ ვართ ისტერიულები. ჩვენ ძალიან მშვიდად უნდა შევეცადოთ და რუსეთთან მიმართებაში რამდენიმე მნიშვნელოვანი პოზიცია ჩამოვაყალიბოთ. პირველი ეს არის ის, რომ ჩვენ არასდროს არ შევეგუებით იმ სტატუსს, რომელშიც ვართ ახლა, როდესაც საქართველოს ტერიტორია ოკუპირებულია. ამასთან მიმართებაში ჩვენ ძალიან სერიოზული რესურსი გვაქვს, ეს არის ჩვენი ხალხის მთლიანობა და მსოფლიო თანამეგობრობის მხარდაჭერა საქართველოს ტერიტორიული მთლიანობისა და სუვერენიტეტისა. შემდეგი მომენტი მდგომარეობს იმაში, რომ საქართველო რუსეთისთვის მტერი არ არის. როდესაც საქართველოს ტერიტორიული მთლიანობა აღდგება, ჩვენ არ ვაპირებთ ვიყოთ რუსეთთან დაპირისპირებული ქვეყანა. ჩვენ ვართ ქვეყანა, რომელიც მიისწრაფვის კეთილმეზობლობისკენ რეგიონში და რომლის სიმშვიდე, კეთილმეზობლობა, დალაგებულობა რუსეთისთვის ხელსაყრელია და არა საზიანო. ჩვენ ვართ მეზობელი, რომელსაც არანაირი მტრობა არ ექნება რუსეთთან როგორც კი ჩვენი ტერიტორიული საკითხები მოგვარდება. ჩვენ არ ვართ მტერი, ჩვენ ვართ ქვეყანა, რომელმაც თავის თავზე განიცადა რუსეთის აგრესია. ჩვენ ამ აგრესიას არ შევეგუებით და საბოლოოდ საქართველო მაინც იქნება ტერიტორიულად მთლიანი, სუვერენული და ამას ვერაფერი დაუდგება წინ. მუდმივად ვეტყვით რუსეთს, რომ ჩვენ არ ვართ მტრები, მაგრამ გვჭირდება ტერიტორიული მთლიანობა”,-განაცხადა გიორგი მარგველაშვილმა გადაცემა “პირველ სტუდიაში”.