„ბურჯანაძე - ერთაინი ოპოზიციის“ ლიდერი ანტიდისკრიმინაციული კანონის გარშემო ატეხი აჟიოტაჟს "ხელოვნურად ინსპირირებულს" უწოდებს.

ნინო ბურჯანაძე მიიჩნევს, რომ აღნიშნული თემის გარშემო ვითარების გამწვავება იმ ძალების მიერ ხდება, რომელსაც ქვეყანაში სიტუაციის დაძაბვა სურთ.

"სრულიად გაუგებარია, "ქართული ოცნების" პოზიცია, რაში სჭირდება "ქართულ ოცნებას" ისეთი გადაწყვეტილებების მიღება, რომელიც ისედაც არის საქართველოს კონსტიტუციაში ჩაწერილი. ის ფაქტი, რომ დისკრიმინაციას არავინ არ უნდა ეგუებოდეს, ეს საერთოდ კითხვის ნიშანსაც არ იწვევს. მაგრამ ასეთი აფიშირება და რეკლამირება იმ თემებისა, რომელიც ანტიდისკრიმინაციული კანონის უკან დგას, ეს ნამდვილად არ შედის საქართველოს სახელმწიფო ინტერესებში. ეს არის ხელოვნურად მოტანილი თემა, იმ მიზეზით რომ ყურადღება იქნას გადატანილი სხვა სასიცოცხლოდ მნიშვნელოვანი საკითხებისაგან. მე არ მესმის, ვის საქმეს აკეთებენ "ქართული ოცნების" წარმომადგენლები და საერთოდ ვერ გავიგე, რა მიზანს ემსახურება დავით უსუფაშვილის განცხადება, რომ თურმე ანტიდისკრიმინაციული კანონის მიღებაზე ყოფილა დამოკიდებული ჩვენ ევროპისკენ წავალთ თუ დავრჩებით რუსეთში. ჩვენ რა, რუსეთში ვართ? მე მეგონა, რომ რუსეთში არ ვიყავით. აღმოჩნდა, რომ პარლამენტის თავმჯდომარე თვლის, რომ თურმე ჩვენ რუსეთში ვყოფილვართ. ესეც ძალიან სერიოზული კითხვის ნიშანია. არავინ არ აყენებს საკითხს ასე, რომ საქართველოს მოსახლეობამ არჩევანი გააკეთოს ევროპასა და რუსეთს შორის. ასე საკითხის დაყენება ეს არის, ნამდვილად საქართველოს სახელწმიფოებრივი ინტერესების წინააღმდეგ მოქმედება. ასე საკითხის დაყენება, ნამდვილად არ ასხამს ევროპის და დასავლური ცივილიზაციის და ფასეულობების წისქვილზე წყალს. ასე, რომ ბატონებო, ან დაუკვირდით რა განცხადებას აკეთებთ, ან მაშინ ჩვენ ვიფიქრებთ ვის საქმეს აკეთებთ! საქართველოს საქმე ამით ნამდვილად არ კეთდება", - განაცხადა ბურჯანაძემ.