საავტომობილო გზების დეპარტამენტის თავმჯდომარის უკვე ყოფილი მოადგილე ოსებ ქადაგიშვილი თბილისის ვიცე-მერობისთვის ემზადება.

ამის შესახებ „ნიუპოსტს“ უმცირესობის წევრმა ირმა ნადირაშვილმა განუცხადა.

მისი თქმით, არსებობს ვარაუდი, რომ ქადაგიშვილი ჯერ „ქართული ოცნების“ საარჩევნო სიით საკრებულოში გადავიდეს და შემდეგ გახდეს ვიცე-მერი.

„ეს არის ადამიანი, რომელიც წარმოადგენდა ღარიბაშვილი-თამაზაშვილის ოჯახის კლანს საგზაო დეპარტამენტში. ჩვენ არაერთხელ ვისაუბრეთ, რომ ის გარეული იყო სხვადასხვა კორუფციულ გარიგებებში და მოვითხოვეთ მისი გადაყენება, მაგრამ ეს არ მოხდა. ეხლა გავრცელდა ინფორმაცია, რომ ქადაგიშვილი გადადგა თანამდებობიდან. ის უფრო ადრე უნდა გადამდგარიყო , რადგან მას არ უნდა ჰქონდეს შეხება საბიუჯეტო სახსრებთან. არ ვთვლი, რომ გადადგომა მის კორუფციულ საქმიანობას შეიძლება უკავშირდებოდეს. შემიძლია ორი ვარაუდო გამოვთქვა. ერთი, რომ ჯანყარაშვილის კადრი გახლავთ ქადაგიშვილი და შესაძლოა ჯანყარაშვილის გადადგომამ იმოქმედა მის წასვლაზე. თუმცა უფრო რეალური მგონია მეორე ინფორმაცია, რომელსაც მე ვფლობ. ის ემზადება თბილისის ვიცე-მერობისთვის. უნდა , რომ საკრებულოს სიით გახდეს დეპუტატი და იმ შემთხვევაში თუ ნარმანია მოიგებს არჩევნებს გახდეს ვიცე-მერი“, - განაცხადა ნადირაშვილმა „ნიუპოსტთან“ საუბარში.

იოსებ ქადაგიშვილმა საავტომობილო გზების დეპარტამენტის თავმჯდომარის მოადგილის თანამდებობა დღეს დატოვა. როგორც „ნიუპოსტს“ საავტომობილო გზების დეპარტამენტში განუცხადეს, აღნიშნული გადაწყვეტილება ქადაგიშვილმა საკუთარი სურვილით მიიღო.