„დემოკრატიული მოძრაობის“ პოლიტიკური მდივანი შვედეთის საგარეო საქმეთა მინისტრის განცხადება აკრიტიკებს, რომლის მიხედვით მართლმადიდებლობა ისლამურ ფუნდამენტალიზმზე უფრო საშიში მოვლენაა.

გიგლა ბარამიძის თქმით, მსგავსი განცხადებები ძალადობის წახალისება და შეუწყნარებლობის ღია პოპულარიზაციაა.

„ევროპის ერთ-ერთი მოწინავე დემოკრატიის ქვეყნის, შვედეთის, ძალზედ მაღალი რანგის დიპლომატის ყოვლად გასაკვირად უპასუხისმგებლო განცხადება პირდაპირ ეწინააღმდეგება ზოგადსაკაცობრიო და დასავლურ ფასეულობების ფუნდამენტურ პრინციპებს. სხვათაშორის, იმ პრინციპებს, რომელიც დიდწილად სწორედ ქრისტიანული, ზოგადად, და კონკრეტულად, მართლმადიდებლურ ეთიკას ეფუძნება. მიგვაჩნია, რომ მსგავსი განცხადებები მხოლოდ და მხოლოდ დისკრედიტაციას ახდენს დასავლური ფასეულობებისა და ჩვენი მოსახლეობის დიდ ნაწილს რწმენას უკარგავს ამ ფასეულობებისადმი. პირდაპირ შეიძლება ითქვას, რომ ეს არის ძალადობის წახალისება, ფსევდოდემოკრატიზმის დამკვიდრების მცდელობა და შეუწყნარებლობის ღიად პოპულარიზება. კოალიცია „ ბურჯანაძე - ერთიანი ოპოზიცია“ მიიჩნევს, რომ შვედეთის ხელსიუფლებამ მკაცრი პოზიცია უნდა დაიკავოს მისი ასეთი მაღალი რანგის თანამდებობის პირის მიერ გაკეთებულ სრულიად უაპელაციო განცხადების გამო,“ - აღნიშნა გიგლა ბარამიძემ.