არასამთავრობო ორგანიზაციები კანონის განხილვას 15 მაისამდე ითხოვენ

პოლიტიკა - 14:21, 30 Apr, 2014

600

კამპანია “ეს შენ გეხებას” მონაწილე ორგანიზაციები დღეს ქუთაისში ჩასვლას, პარლამენტის თავმჯდომარესთან და უმრავლესობის ლიდერებთან შეხვედრას გეგმავენ. ამის შესახებ “საერთაშორისო გამჭვირვალეობა-საქართველოს” აღმასრულებელმა დირექტორმა ,,პირველის' პრეს კლუბში განაცხადა არასამთავრობო ორგანიზაციები კანონის განხილვას 15 მაისამდე ითხოვენ.
“დაახლოებით ერთი წელია, კანონპროექტი პარლამენტშია შესული. ამ პერიოდის განმავლობაში როგორც კომიტეტებს, ასევე აღმასრულებელი ხელისუფლების ორგანოებს შესაძლებლობა ჰქონდათ თავიანთი შენიშვნები წარედგინათ. ჩვენი ინფორმაციით, ამ საკითხზე საკანონმდებლო ორგანოს, შსს-სა და პროკურატურის წარმომადგენლებს შორის რამდენიმე შეხვედრა შედგა. ვერბალურად მათ მიერ წარმოდგენილი იქნა შენიშვნები, რომლითაც არ ეთანხმებოდნენ კანონპროექტში მოცემულ დებულებებს და პრაქტიკულად არ ეთანხმებოდნენ ამ მანკიერი პრაქტიკის შეცვლას. დღეს ჩვენ ვხედავთ, რომ გარკვეული პარლამენტარების მხარდაჭერის მიუხედავად, პროცესი ჭიანურდება და პარლამენტი თვითმმართველობის არჩევნებამდე ამ საკითხის განხილვას არ აპირებს. ვფიქრობ, პროცესი სპეციალურად ჭიანურდება და მგონია, რომ საქართველოს მთავრობას არ ყოფნის პოლიტიკური გამბედაობა, ეს პრაქტიკა შეცვალოს და თვალთვალისა და მიყურადების სისტემაში ძირეული რეფორები განახორციელოს. როდესაც “ქართული ოცნება” ოპოზიციაში იყო, ამომრჩევლებს ამ მიმართულებით გარკვეულ ცვლილებებს პირდებოდა. დღეს კი ვდგავართ იმ მოცემულობის წინაშე, რომ კოალიცია ამ კონკრეტულ დანაპირებს არ ასრულებს. ჩვენ მმართველი გუნდის მხრიდან გვაინტერესებს კონკრეტული მოსაზრებები და არგუმენტები, რატომ ხდება ამ პროცესის შეფერხება და მოვითხოვთ დროის იმ მცირე მონაკვეთში, რომელიც ადგილობრივი თვითმმართველობის არჩევნებამდე დარჩა, ეს კანონპროექტი განიხილონ. პროცედურულად ეს შესაძლებელია”, – განაცხადა ეკა გიგაურმა. “საერთაშორისო გამჭვირვალეობა-საქართველოს” აღმასრულებელმა დირექტორმა, ასევე კამპანია “ეს შენ გეხებას” აქტივობებზე ისაუბრა და აღნიშნა, რომ უკანონო მოსმენების შესახებ კანონპროექტის მიღების ერთ-ერთი მთავარი ბერკეტი მოქალაქეების აქტივობა და პროცესში საერთაშორისო ორგანიზაციების მონაწილეობაა. გიგაურმა ასევე აღნიშნა, რომ კამპანიის ფარგლებში მოქალაქეების ჩართულობით აქციებიც იგეგმება.