ბერძენიშვილი: ანტიდისკრიმინაციულ კანონზე დაპირისპირება არის დაპირისპირება განათლებასთან

პოლიტიკა - 13:46, 30 Apr, 2014

1704

საპარალამენტო უმრავლესობის წევრი ლევან ბერძენიშვილი აცხადებს, რომ ისეთი ხალხი, ვისაც მიაჩნია, რომ საქართველოში დისკრიმინაცია უნდა განხორციელდეს, მისი თქმით, ასეთი აზრის მქონე ადამიანები ჩასახუტებელი და მოსაფერებელი არიან.

თუმცა დეპუტატი მიიჩნევს, რომ ასეთი ადამიანების აზრი გათვალისწინებული არ უნდა იყოს.

მისი თქმით, მსგავსი კანონის მიღება ევროპასთან არაფერ შუაშია, რადგან ეს კანონი საქართველოს სჭირდება.

"როდესაც რომელიმე ერთი ჯგუფის დისკრიმინაცია ხდება, ეს ნიშნავს, რომ ყველას დისკრიმინაცია ხდება. თუ დღეს ერჩიან მაგალითად მსუქნებს, ხვალ შეიძლება პრობლემები შეექმნათ გამხდრებს. ამიტომ ამას დიდი ახსნა-განმარტება არ სჭირდება. ეს განათლების საკითხია. მიჩანია, რომ ანტიდისკრიმინაციულ კანონზე დაპირისპირება არის დაპირისპირება განათლებასთან. ის ინსტიტუტი, რომელიც საბჭოთა პერიოდში თვითონ იყო დისკრიმინაციის საგანი არ უნდა იბრძოდეს დისკრიმინაციისთვის. ისინი მხარში უნდა გვედგნენ და გვეხმარებოდნენ, რომ არავისი დისკრიმინაცია მათ შორის რელიგიური მოტივით არ უნდა მოხდეს. პარლამენტი სწორდ მოიქცევა თუ მივიღებთ ამ კანონს", - განაცხადა ლევან ბერძენიშვილმა.

გუშინ, საკანონმდებლო პაკეტის განხილვა ადამიანის უფლებათა დაცვის სხდომაზე 5-საათზე მეტი ხნის განმავლობაში მიმდინარეობდა. სხდომაში მონაწილე სასულიერო პირებისა და მათთან ერთად არასაპარლამენტო ოპოზიციის მთავარი მოთხოვნა "სექსუალური ორიენტაციის" და "გენდერული იდენტობის" პუნქტების ამოღება იყო. მათი შეფასებით, კანონში აღნიშნული ტერმინების დაფიქსირება "ცოდვისა და უზნეობის დაკანონებას ნიშნავს".