ახალაიას ადვოკატი უკანონო მოსმენის კონკრეტულ მაგალითს ასაჯაროვებს

სოც.მედია - 18:25, 25 Apr, 2014

2527

კუდის ყოფილი ხელმძღვანელის დათა ახალაიას ადვოკატი ირაკლი ზაქარეიშვილი აცხადებს, რომ ხელისუფლება მისი სატელეფონო საუბრების უკანონო მოსმენას ახორციელებს.
„მსურს გამოვხატო პროტესტი და უკიდურესი აღშფოთება ხელისუფლების მიერ ჩემი სატელეფონო საუბრების უკანონო მოსმენებთან დაკავშირებით! გუშინ, 2014 წლის 24 აპრილს, ერთერთ სატლეფონო საუბარში ვახსენე, რომ მოსამართლე ბესიკ ბუგიანიშვილის მიერ გამოტანილ განაჩენში, დავით ახალაიას პირადი ნომერი შეტანილია არასწორად, რამაც შესაძლოა წარმოქმნას სამართლებრივი პრობლემა საბერძნეთის რესპუბლიკაში დავით ახალაიას პერსონის იდენტიფიცირების საკითხთან დაკავშირებით.
დღს, 2014 წლის 25 აპრილს დაახლოებით 12:15 საათზე დამიკავშირდა მოსამართლე ბესიკ ბუგიანიშვილის თანაშემწე და მაცნობა, რომ გამოტანილია შესაბამისი განჩინება, რომლითაც განაჩენში შესწორდა ტექნიკური ხარვეზი დავით ახალაიას პირად ნომერთან დაკავშირებით.
სასამართლოს შესაბამისი მოხელის ზეპირსიტყვიერი განმარტებით, სასამართლოში დარეკა პროკურორმა ლევან ბაჩიაშვილმა და მოითხოვა – დავით ახალაიას პირად ნომერთან დაკავშირებით განაჩენში დაშვებული ტექნიკური ხარვეზის შესწორება. ვინაიდან პროკურატურას ფრიად ეჩქარებოდა ამ საკითხზე შესაბამისი განჩინების მოპოვება, სასამართლოში შუამდგომლობა არ შეუტანიათ და მხოლოდ ზეპირსიტყვიერი მოთხოვნით დაკმაყოფილდნენ.
შეგახსენებთ, რომ მოსამართლე ბესიკ ბუგიანიშვილის მიერ განაჩენი გამოტანილია ა.წ. 14 მარტს და ხსენებული ტექნიკური ხარვეზი შეუმჩნეველი იყო ჩემს მიერ კერძო სატელეფონო საუბარში ამ საკითხის წამოჭრამდე“, - წერს ირაკლი ზაქარეიშვილი „ფეისბუქის“ საკუთარ გვერდზე.