ერეკლე კოდუას ადვოკატის ოთო კახიძის ცნობით, პროკურატურამ მას კოდუას საქმეში არსებული მასალების გასაჯაროება აუკრძალა.

ამის შესახებ კახიძე „ფეისბუქზე“ წერს.

მისი თქმით, პროკურატურაში მისვლის დროს ხელწერილის ტექსტი წარუდგინეს და მასზე ხელის მოწერა სთხოვეს. ადვოკატის თქმით, დოკუმენტი მოწმის ჩვენების ჩანაწერის და ამოღების ოქმის გასაჯაროებას კრძალავდა.

„პროკურატურიდან დამირეკეს, კოდუას საქმეზე დამატებითი მასალების გადმოცემა გვინდაო. მივედი, ჩავიბარე დოკუმენტები. წამოსვლას ვაპირებ და ამ დროს, გამომძიებელი მაწვდის რაღაც ხელწერილის ტექსტს.

იმ ფურცლის თანახმად, პროკურატურა ადვოკატს მავალდებულებს, არ გავამჟღავნო საქმეში არსებული ცნობები ვიფიქრე, სახელმწიფო საიდუმლოების შემცველ მონაცემებს გულისხმობდა, მაგრამ ნურას უკაცრავად - თურმე მოწმის ჩვენებაში რა წერია და ამოღების ოქმი რას ეხება - იმის თქმის უფლება ამიკრძალეს წინააღმდეგ შემთხვევაში სისხლისსამართლებრივი პასუხისმგებლობა დაგეკისრებაო

რა თქმა უნდა, დოკუმენტს ხელი არ მოვაწერე. ბრალდებულისა და ადვოკატის შეზღუდვა, საქმის მასალები არ გაახმაუროს, მათ შორის ღია სასამართლო სხდომაზე, ეწინააღმდეგება კონსტიტუციას.

სახალისოა, რომ იგივე პროკურატურა თვითონ ბრიფინგს ბრიფინგზე ატარებს და საქმის მასალებს იუთუბზე ტვირთავს, ჰაკიმ ფაშას სახელით.

პ.ს. შევხვდებით საკონსტიტუციო სასამართლოში“, - წერს კახიძე.