შაშკინი სანიკიძეს "მავნებელ მინისტრს" უწოდებს

სოც.მედია - 22:37, 17 Apr, 2014

4851

განათლების ყოფილი მინისტრი დიმიტრი შაშკინი ამჟამინდელ მინისტრს აკრიტიკებს და მას მავნებელს უწოდებს. განცხადებას შაშკინი "ფეისბუქზე" აკეთებს.
"საქართველოში კონკურსი რომ ჩატარდეს ყველაზე მავნებელი მინისტრის გამოსავლენად, პირველ ადგილს, დიდი უპირატესობით, თამარ სანიკიძე დაიკავებდა. სხვა მინისტრების უმრავლესობა არაფერს მაინც არ აკეთებს - არც კარგს და არც ცუდს, ხალხისთვის ვგულისხმობ. განათლების მინისტრი კი გამოირჩევა მავნებლობის დიდი სურვილით. არადა განათლებაში ძალიან ბევრი რამ არის გასაკეთებელი. მაგრამ ქალბატონი თამარი ჯიუტად ანგრევს და აფუჭებს იმას, რაც კარგად მუშაობს.
მაგალითად: მანდატურების ინსტიტუტი მუშაობდა, მან დაანრგია; პროფესიული განათლების ვაუჩერი მუშაობდა, მან დაანგრია; ამერიკელი და ევროპელი მასწავლებლების პროგრამა მუშაობდა, მან დაანგრია; ამერიკული უნივერსიტეტი იხსნებოდა, მან გააჩერა; სახელმწიფო უნივერსიტეტებს უცხოელი პროფესორები ჩამოჰყავდათ, მან გააჩერა; „მომავლის კლასები“ იხსნებოდა სკოლებში, მან გააუქმა; ბავშვებისა და მასწავლებლების შესაძლებლობა გამოცდები ჩააბარონ მთელი წლის განმავლობაში მან გააუქმა; მშობლები იღებდნენ გადაწყვეტილებას როდის უნდა მიეყვანათ ბავშვი სკოლაში- 5 თუ 6 წლის ასაკში, მან ესეც გააუქმა და უთხრა, რომ მინისტრმა მშობლებზე უკეთ იცის ეს საკითხი; და ასე შემდეგ …
ბოლო 18 თვის განმავლობაში სკოლებისთვის არცერთი ახალი მერხი, სკამი, ლაბორატორია, "სმარტ ბორდი" ან კომპიუტერი განათლების სამინისტროს არ შეუძენია! ერთი საამაყო ჰქონდა, რომ ბავშვებს წიგნები უფასოდ დაურიგა, მაგრამ ესეც ისე გააკეთეს, რომ 60 მილიონიანი ბაზარი მოკლეს, ზოგი გამომცემელი გააკოტრეს და ხალხი უსამსახუროდ დატოვეს. წიგნების რაოდენობა აურიეს და 12 მილიონის ნაცვლად 19 მილიონი დახარჯეს.
ახლა ქალბატონი თამარი მიადგა ეროვნულ სასწავლო გეგმას და სწავლის პერიოდს. ბავშვები 15 სექტემბერს რომ იწყებდენ სწავლას არ მოსწონს. ეტყობა პირველი სექტემბრის ნოსტალგია აწუხებს და გინდა თუ არა რუსეთთან ერთად უნდა ვიწყებდეთ სწავლას..."- წერს სოციალურ ქსელში დიმიტრი შაშკინი.