,,ქრონიკა+“-ის მთავარი რედაქტორი ელისო კილაძე ვალერი გელაშვილის ცემის ფაქტთან დაკავშირებით ,,ფეისბუქის“ გვერდზე წერს, კილაძის ინფორმაციით, პირი, რომელმაც გელაშვილი ცემა, დღეს ფინანსური პოლიციის სპეცრაზმის უფროსად დანიშნეს.

,,ერთი წლის წინათ, დაახლოებით ამ დროს ერთ-ერთ არხზე ვთქვი - ბატონო ბიძინა, თქვენ ჩემგან სიცოცხლით ხართ დავალებული-თქო. გამგებმა გაიგო. მას შემდეგ ამ თემას აღარ დავბრუნებივარ. წუხანდელი გელაშვილის განცხადების მერე მგონი ვალდებული ვარ საჯაროდ ვთქვა ის, რაც ვიცი:

შარშან მარტში, ჩემი მეგობრის მეშვეობით ძალოვანი უწყების ერთ-ერთი ყოფილი მაღალჩინოსანი დამიკავშირდა. მე მას გვიან ღამით შევხვდი. მან გადმომცა ინფორმაცია იმის შესახებ, რომ მზადდებოდა ბიძინა ივანიშვილის ლიკვიდაცია, რომ 25 ყოფილ სპეცრაზმელს ამზადებდნენ ერთ-ერთ ბაზაზე (დამისახელა ადგილმდებარეობაც) მანვე მოითხოვა შეხვედრა მაშინდელ შინაგან საქმეთა მინისტრის ირაკლი ღარიბაშვილის ნდობით აღჭურვილ პირთან (სხვას არ ენდობოდა) იმავე ღამეს, დილის ოთხ საათზე, ასევე ჩემი მეგობრების მეშვეობით, მოიძებნა ის პიროვნება და გამთენიისას, ყოფილი მაღალჩნოსანი მას შევახვედრე. სწორედ ამ ყოფილმა მაღალჩინოსანმა მითხრა იმ ღამით - დეპუტატ ვალერი გელაშვილის ცემას ვინც ხელმძღვანელობდა, დღეს ფინანსური პოლიციის სპეცრაზმის უფროსად დანიშნესო.

p.s.უმორჩილესად ვთხოვ, ჩემს მეგობრებს ხელისუფლებიდან, გამოძიების პროცესში ეს ინფორმაცია გადაამოწმონ. სხვა შემთხვევაში, აუცილებლად დავასახელებ ამ ისტორიის მონაწილეთა ვინაობას“, - წერს ელისო კილაძე.

ხაშურის მაჟორიტარმა დეპუტატმა ვალერი გელაშვილმა, გადაცემა ,,რეაქციაში" მისი ცემის ორგანიზებაში ბრალი დასდო ექსპრეზიდენტს მიხეილ სააკაშვილს, შს ყოფილ მინისტრს ვანო მერაბიშვილს და კრიმინალური პოლიციის ყოფილ უფროსს ერეკლე კოდუას. გელაშვილის თქმით, კოდუა მისი ცემის მომენტში, იქვე მოშორებით იმყოფებოდა.