პარლამენტის გადაწყვეტილებით, ანტიმონოპოლიური კანონმდებლობის ფარგლებში შეიქმნა კონკურენციის სააგენტო, რომელიც ოფიციალურად 15 აპრილს ამოქმედდება.

პარლამენტის საფინანსო-საბიუჯეტო კომიტეტის თავმჯდომარე „ალიასთან“ საუბარში აცხადებს, რომ სააგენტო ერთ-ერთ პირველ საკითხად საწვავზე ფასწარმოქმნის შესწავლას დაიწყებს.

„წლების მანძილზე არსებული მონოპოლისტური ფასები, კარტელური შეთანხმებები, მთელ რიგ ბიზნესში კიდევ დარჩა, მათ შორის, საწვავის სფეროში, რომელიც ყველაზე პოლიტიზირებული იყო. უნდა იქნას გამოკვლეული, როგორ ხდება ფასწარმოქმნა, საზოგადოებამაც უნდა იცოდეს და თუ რამე ისეთია, შესაბამისი ზომაც იქნეს მიღებული, რადგან ამ ტიპის სამსახური არ არსებობდა, ამიტომაც ახლა, როცა ის იქმნება, მათთვის პრიორიტეტი იქნება, შესწავლონ კარტელური შეთანხმებები და მონოპოლიზებული ბაზარი. ყველა გადაწყვეტილება იქნება მიღებული კვლევების შედეგად, ფასწარმოქმნის მექანიზმებზე იმუშავებენ, რამდენად ობიექტური იქნება ეს ფასი და ა.შ.“- აცხადებს დავით ონოფრიშვილი „ალიასთან“ საუბრისას.

მისი თმით, ამ ეტაპზე ძნელია იმის განსაზღვრა თუ რამდენით გაიაფდება საწვავის ფასი.

„თუ გახსოვთ, „ნაციონალები“ ამბობდნენ, საწვავის ფასებიდან 1 ლარს გვედავებიანო, ჩვენ მათ ერთ ლარს კი არა, 15-20 თეთრს ვედავებოდით. მონოპოლისტური ფასებიდან ეს თეთრები მიდიოდა ჯიბეებში. აბა, გადათვალეთ, თვის და წლების მანძილზე ეს 15-20 თეთრი რა თანხას შეადგენს.

გარწმუნებთ, სააგენტო, რომელიც თვის ბოლოსთვის უკვე ამოქმედდება, მნიშვნელოვან კვლევას განახორციელებს და პირველივე ნაბიჯებსაც მალე დაინახავს საზოგადოება...

აქამდე კანონი უნდა მიგვეღო კონკურენციის შესახებ, რომ მერე სააგენტო გაგვეკეთებინა. უცბად რას გააკეთებს სააგენტო, არ ვიცი, მაგრამ ნელ-ნელა გამოცდილებას მიიღებს, მთავარია, წესიერად იმუშაოს და მასში ჩაიდება ის ინტერესი, რაც კანონის შემქმნელებმა გადავწყვიტეთ,“ - აცხადებს „ალიასთან“ საუბარში დავით ონოფრიშვილი.

ნინო დათაშვილი