დარჩიაშვილი ჟვანიას საქმის გარშემო ივანიშვილის ხელწერას ხედავს

სოც.მედია - 12:26, 21 Mar, 2014

2119

საპარლამენტო უმცირესობის წევრი დავით დარჩიაშვილი, ყოფილი პრემიერის ზურაბ ჟვანიას საქმის გარშემო განვითარებულ მოვლენებს სოციალური ქსელით ეხმაურება.
„ანუ, ჟვანიას შესახებ გავრცელებული ვიდეო ფალსიფიცირებულიაო, ამბობს ექსპერტიზის მონაწილე და მას აკავებენ. ვიდეო ზოდელავას სეიფში იდოო, ამბობს პროკურატურა. ორი კითხვა და ერთი დასკვნა: ზოდელავას კაბინეტში ვიდეო რომ იდო, ფალსიფიცირებული იყო თუ არა? ზოდელავას სეიფიდან ამდენი ხნის შემდეგ ვიდეო (თუ ეს ისაა) you tube-ში ვინ გვამთმოყვარულმა წრემ მოახვედრა? დასკვნა: პროკურატურა ასრულებს მთავრობის დაკვეთას: ამყოფონ საზოგადოება სტრესში მედია საშუალებების უკანონო გამოყენებით (წინა დროს ოპერატიული მიზნებისათვის ბევრი რამ შეიძლება გადაეღოთ, როგორც კანონიერად, ისე უკანონოდ. მაგრამ ამ კადრებით მანიპულირება და საყოველთაო სივრცეში განთავსებაა ”საქმე”, რასაც დღევანდელი მთავრობა აკეთებს). ყველაფერი ეს პოლიტიკურია და არა სამართალდაცვითი. ანუ მიზნად პოლიტიკურ ოპონენტებთან ბრძოლას ისახავს და მეტს არაფერს. მაგრამ უფრო დრამატული ისაა, რომ ამ მიზანს საზოგადოებრივი ცნობიერების ზომბირება ემსახურება. ეს კი უშუალოდ ივანიშვილის ხელწერაა“, - წერს დავით დარჩიაშვილი „ფეისბუქის“ საკუთარ გვერდზე.
წუხელ გვიან ღამით, მთავარმა პროკურატურამ ყოფილი პრემიერის ზურაბ ჟვანიასა და რაულ უსუპოვის გარდაცვალების საქმის მთავარი ექსპერტი ლევან ჩაჩუა დააკავა.
რამდენიმე წუთის წინ კი, ბადაშვილის უწყებამ კიდევ ერთი დაკავების შესახებ გაავრცელა ინფორმაცია. პროკურატურამ ზურაბ ჟვანიას დაცვის ცვლის უფროსი მიხეილ ძაძამია დააკავა.