ვუთანაგრძნობ დასავლეთს საერთაშორისო სამართლის გარდაცვალებას

ვუთანაგრძნობ დასავლეთს საერთაშორისო სამართლის გარდაცვალებას - გრიგოლ ვაშაძე

სოც.მედია - 12:54, 18 Mar, 2014

1525

საგარეო საქმეთა ყოფილი მინისტრი გრიგოლ ვაშაძე ყირიმში ჩატარებულ რეფერენდუმს ,,ფეისბუქის“ გვერდზე ეხმაურება:

"ვულოცავ "ერთმორწმუნე" პუტინის რუსეთს, რომ მან თავის 17 მილიონ კვადრატულ კილომეტრ ტერიტორიას, რომელიც არ სჭირდება და რომელსაც ვერ უვლის, ანექსიის გზით მიუმატა 26 ათასი კვადრატული კილომეტრი, რომელიც მარტო რეჟიმის გასამყარებლად სჭირდება და რომელსაც ვერ მოუვლის.

ვულოცავ რუსეთის მოსახლეობას, რომლის 90% ყირიმის ანექსიას უჭერს მხარს, უამრავი ახალი პრობლემის შეძენას. და ვთხოვ ახსოვდეთ სალტიკოვ-შჩედრინის სიტყვები: "Когда в России начинают говорить о патриотизме, знай: где-то что-то украли..."

ვულოცავ ყირიმელ რუსებს რუსეთთან მიერთებას და იმას, რომ მათ მალე ასწავლიან "как Родину любить". ოღონდ ახსოვდეთ, რომ რეფერენდუმს არავინ არასოდეს აღარ ჩაატარებინებთ.

ვულოცავ ჩვენ ხელისუფლებას, რომ რუსეთიდან ეხლა მიიღეს გზავნილი ახალ რუსულ საგარეო პოლიტიკურ დოქტრინაზე "об ограниченном суверенитете постсоветских стран". რასაც მოიფიქრებთ - მოიფიქრებთ, დანარჩენს გ. ბ. კარასინი პრაღაში აგიხსნით.

ვუთანაგრძნობ დასავლეთს საერთაშორისო სამართლის გარდაცვალებას. ძალიან დაგვაკლდება განსვენებული! სუსტი იყო, ხშირად ავადმყოფობდა, კიდევ უფრო ხშირად პასუხი არ ჰქონდა სამართლებრივ კოლიზიებზე, მაგრამ მაინც საჭირო იყო და თავისი არსებობით ერთგვარი სიმშვიდე შემოჰქონდა ამ არეულ სამყაროში.

დანარჩენებს - ღამე მშვიდობისა!"