ექსპერტი სერგი კაპანაძე სოციალურ ქსელში უმრავლესობის დეპუტატის დავით საგანელიძის იმ განცხადებას ეხმაურება, სადაც დეპუტატი ყირიმის მოვლენებს კოსოვოს უკავშირებს.

,,უაღრესად სამწუხაროა, რომ ამხელა პოლიტიკური ამბიციების და თანამდებობის პირს ელემენტარული რამ არ ესმის - რომ ყირიმში მოვლენები არ უნდა დააბრალოს კოსოვოს და კოსოვოს პრეცედენტი არ უნდა დაარქვას.

მიაწვდინეთ ვინმემ ხმა პატივცემულს, რომ:

- კოსოვოს აღიარება მოხდა იმიტომ, რომ სერბებმა მოახდინეს კოსოვოში ეთნიკური წმენდა; კოსოვოში წლების განმავლობაში იყო საერთაშორისო ყოფნა; კოსოვოს სახელმწიფო ინსტიტუტებმა დამოუკიდებლობა გამოაცხადეს მას შემდეგ, რაც მსოფლიო დარწმუნდა, რომ ისინი დემოკრატიულ საწყისებზე იყვნენ შექმნილი და შეძლებდნენ ხალხის ნების გამოხატვას; კოსოვოშ მოხდა ინტერვენცია ადგილობრივი მოსახლეობის დაცვის მიზნით; კოსოვოსთან დაკავშრებით მოქმედებდა გაეროს უშიშროების საბჭოს რეზოლუცია და მხარეების დაახლოებას აქტიურად ცდილობდა საერთაშორისო თანამეგობრობა, მათ შორის, ფინეთის ყოფილი პრეზიდენტი მარტი აჰტისაარი.

- საქართველო კოსოვოს არ აღიარებს პრეცედენტად! აღიარებს უნიკალურ შემთხვევად, რომელსაც არ აქვს გავლენა მსოფლიოშ სხვა კონფლიქტებზე. არც საქართველოში, არც დნესტრისპირეთში და არც ყირიმში! სტუდენტებმაც კი იციან, რომ კოსოვო არის sui generis შემთხვევა, ანუ მხოლოდ თავის მსგავსი, უნიკალური და არა პრეცედენტი. მის "პრეცედენტულობას" ამტკიცებს მხოლოდ რუსეთი, ასევე სოხუმი, ცხინვალი, ტირასპოლი და ა.შ.

- ყირიმში რაც ხდება, ამას არაფერი აქვს საერთო კოსოვოსთან. ეთნიკური წმენდა მოხდა ყირიმში? საერთაშორისო ყოფნა იყო, რომელმაც მოამზადა დამოუკიდებლობის რეფერენდუმი? გაეროს უშიშროების საბჭოს რეზოლუცია იყო? დამკვირვებლებსაც კი არ უშვებენ შიგნით?

უკან დაგვიბრუნდება ასეთი განცხადებები! ნაბიჯ-ნაბიჯ! ნელა-ნელა!“, - წერს სერგი კაპანაძე.