გოგა ხაჩიძე: ბ-ნო ირაკლი! ნუ აფრქვევთ ბოღმას, ღვარძლს...

სოც.მედია - 13:58, 07 Mar, 2014

1556

საპარლამენტო უმცირესობის წევრი გოგა ხაჩიძე, სოციალური ქსელის მეშვეობით საქართველოს პრემიერს ირაკლი ღარიბაშვილის მიმართავს და რჩევებს აძლევს. „არა, ვერ ვიტყვი რომ არ ცდილობს. სიმართლე გითხრათ, სხვანაირად ვერც კი წარმომიდგენია. რეალურად დიდი პასუხისმგებლობა დააკისრა ბ-მა განგებამ. ღირსებებიც აქვს, რა თქმა უნდა. სხვაგვარად, ეგეც შეუძლებელი მგონია. ზოგადადაც არ არსებობენ აბსოლუტურად უღირსი ადამიანები. ალბათ, პირად და მეგობრულ ურთიერთობებშიც, რაღაც პონტში, "მაგარი ჯიგარია". მისი ინგლისური და ფრანგული რომ მოვისმინე, ჯერ გამიკვირდა, შემდეგ მომეწონა ( "გამისწორდა" იქნებოდა სწორი ტერმინი), მერე ალბათ ცოტა შემშურდა კიდეც. არც თეთრი, არც შავი,.. ჩვეულებრივი, ნორმალური შურით, რომელიც ზიანს არავის აყენებს და პირიქით, თუ სწორად აზროვნებ, სტიმულადაც შეიძლება გექცეს. მსოფლიოში ყველაზე ახალგაზრდა პირველი პირია. ქვეყანას მართავს (როგორ - სხვა თემაა), ვიზიტები აქვს, პოლიტიკოსებს ხვდება... აგერ, ყველაფერს რომ თავი დავანებოთ, ამერიკის პრეზიდენტს - ბარაკ ობამას შეხვდა. კარგია, მაგარია, ძალიან მნიშვნელოვანია, დიდი გამოცდილებაა... მართლა არ ვარ ისე განწყობილი, რომ ამ კონკრეტულ ადამიანში, მიუხედავად მისი მარიონეტული მდგომარეობისა (გასაგებია ვის მიმართაც), რაიმე პოზიტივი არ დავინახო, არ დავაფასო, ან თუნდაც არ შევიმჩნიო. მაგრამ რად გინდა?!... უბრალოდ, თვითონ არ გაძლევს საშუალებას დაივიწყო... დაივიწყო ის, რაზე ლაპარაკიც, პირადად მე, მორალურ დისკომფორტს მიქმნის. დაივიწყო ის ბიჭი, რომელიც სულ რაღაც წელიწადნახევრის წინ ასე გულმხურვალედ “საუბრობდა” skype-ში. დაივიწყო და დაიჯერო, რომ ის “ბიჭი” შეიძლება, ასე მოკლე ხანში, ქვეყნის ნორმალური მმართველი გახდეს, ოდნავ უფრო მასშტაბურად იაზროვნოს და კომპლექსები არ აწუხებდეს. ბ-ნო ირაკლი! დამშვიდდით, დაწყნარდით… თქვენ, მთელი ქვეყნის პრემიერ-მინისტრი ხართ (შესაბამისად - ჩემიც) და არა მხოლოდ “ქართული ოცნების” ამომრჩევლის. ნუ აფრქვევთ ბოღმას, ღვარძლს, უადგილო თვითდაჯერებულობას, თორემ თქვენს ფრაზებს შორის, ჯერ კიდევ იმ გულწრფელი “ბიჭის” გინების და ლანძღვის სიტყვები მესმის. “დასტოინად” ბ-ნო პრემიერო, “დასტოინად”...“,- წერს გოგა ხაჩიძე „ფეისბუქის“ პირად გვერდზე.

ნინა შადური