ჩერგოლეიშვილი ღარიბაშვილისგან ბოდიშის მოხდას ითხოვს

სოც.მედია - 16:42, 20 Feb, 2014

3930

„ტაბულას“ მთავარი რედაქტორი თამარ ჩერგოლეიშვილი სოციალური ქსელის მეშვეობით, პრემიერ მინისტრ ირაკლი ღარიბაშვილს მიმართავს. აღნიშნულ მიმართვას „ნიუპოსტი“ უცვლელად გთავაზობთ:
„ბატონო პრემიერო, როდესაც ტაბულას შეეშალა და უნებურად ცილი დაგწამათ, თქვენ მყისიერი რეაქცია მიეცით ამაზე. ტაბულამ შეცდომა აღიარა, ბოდიში მოგიხადათ თქვენც და მკითხველსაც და შეცდომაზე პასუხისმგებელი ჟურნალისტი სამსახურიდან გაათავისუფლა.
ახლა დადასტურდა, რომ თქვენ შეგეშალათ. ბოლო პრესკონფერენციაზე თქვენ ეკამათეთ ტაბულას ჟურნალისტს და ამტკიცებდით, რომ ვანო მერაბიშვილი ადვოკატებმა შაბათ-კვირას მოინახულეს, მაშინ როდესაც ტაბულას ჟურნალისტი გიხსნიდათ, რომ ეს მართალი არ არის.
ამის შემდეგ თქვენ გადახვედით შეურაცხყოფაზე და ტაბულას ლეგიტიმური ინტერესი იმას დაუკავშირეთ, რომ მას ოდესღაც კეზერაშვილი აფინანსებდა. არ მაქვს მოლოდინი, რომ საკუთარ თავს სამსახურიდან დაითხოვთ, ამიტომ არ გთხოვთ.
მაგრამ გთხოვთ ბოდიში მოუხადოთ როგორც ტაბულას, ისე ამომრჩეველს დაშვებული შეცდომისათვის და ამის შემდეგ, მეტი პასუხისმგებლობით მოეკიდოთ საკუთარ სიტყვებს“, - წერს თამარ ჩერგოლეიშვილი „ფეისბუქის“ საკუთარ გვერდზე.